चेतक स्क्रीन अवॉर्ड्स 2026: ‘धुरंधर’चा 14 पुरस्कारांसह दबदबा; ‘होमबाउंड’ सर्वोत्कृष्ट चित्रपट
मुंबई : चित्रपट पुरस्कारांविषयी प्रेक्षकांमध्ये पुन्हा आकर्षण निर्माण करत, चेतक स्क्रीन अवॉर्ड्स 2026 ने हिंदी सिनेमा आणि OTT क्षेत्रातील उत्कृष्टतेचा भव्य उत्सव साजरा केला. या सोहळ्यात दिग्दर्शक नीरज घायवान यांच्या ‘होमबाउंड’ या चित्रपटाला सर्वोत्कृष्ट चित्रपटाचा मान मिळाला. महाराष्ट्राचे मुख्यमंत्री देवेंद्र फडणवीस आणि उद्योजिका नीता अंबानी यांच्या हस्ते हा पुरस्कार प्रदान करण्यात आला. दरम्यान, दिग्दर्शक आदित्य धर यांच्या ‘धुरंधर’ या चित्रपटाने तब्बल 14 पुरस्कार पटकावत या सोहळ्यावर वर्चस्व गाजवले. बॉलिवूडचे ज्येष्ठ अभिनेते धर्मेंद्र यांना जीवनगौरव पुरस्काराने सन्मानित करण्यात आले.
आदित्य धर यांना सर्वोत्तम दिग्दर्शक पुरस्कार मिळाला, तर ‘हक’ या चित्रपटासाठी यामी गौतम यांना सर्वोत्तम अभिनेत्रीचा आणि ‘धुरंधर’ साठी रणवीर सिंह यांना सर्वोत्तम अभिनेत्याचा पुरस्कार मिळाला.
OTT क्षेत्रातील वाढत्या प्रभावाला लक्षात घेऊन यंदा पाच नवीन पुरस्कार श्रेणींची भर घालण्यात आली. ‘मिसेस’ मधील अभिनयासाठी सान्या मल्होत्रा यांना सर्वोत्तम अभिनेत्री (OTT) पुरस्कार मिळाला, तर करण तेजपाल दिग्दर्शित ‘स्टोलन’ या चित्रपटाने सर्वोत्तम OTT चित्रपट, सर्वोत्तम दिग्दर्शक (OTT), सर्वोत्तम अभिनेता (OTT) आणि सर्वोत्तम पटकथा (OTT) असे अनेक पुरस्कार पटकावले.
या सोहळ्याचे सूत्रसंचालन अभिनेत्री आलिया भट्ट यांनी केले. त्यांना सुनील ग्रोव्हर, झाकीर खान आणि ‘द इंडियन एक्सप्रेस’चे हिंदी संपादक सौरभ द्विवेदी यांनी साथ दिली. ‘इन मेमोरियम’ विभागात 2025 मध्ये दिवंगत झालेल्या चित्रपटसृष्टीतील दिग्गजांना श्रद्धांजली अर्पण करण्यात आली.
धर्मेंद्र यांच्या वतीने त्यांचे पुत्र बॉबी देओल यांनी जीवनगौरव पुरस्कार स्वीकारला. हा पुरस्कार ज्येष्ठ गीतकार जावेद अख्तर, दिग्दर्शक रमेश सिप्पी आणि मुख्यमंत्री देवेंद्र फडणवीस यांच्या हस्ते प्रदान करण्यात आला. यावेळी भावुक होत बॉबी देओल यांनी आपल्या वडिलांच्या आठवणींना उजाळा दिला.
