भारताने जिंकला टी-२० विश्वचषक; अंतिम सामन्यात न्यूझीलंडवर दणदणीत विजय
अहमदाबाद : भारताने आयसीसी पुरुष टी-२० विश्वचषक २०२६च्या अंतिम सामन्यात न्यूझीलंडवर ९६ धावांनी दणदणीत विजय मिळवत विजेतेपद पटकावले. नरेंद्र मोदी स्टेडियमवर रविवारी झालेल्या या सामन्यात भारताने फलंदाजी आणि गोलंदाजी या दोन्ही आघाड्यांवर प्रभावी कामगिरी करत प्रतिस्पर्ध्यावर पूर्ण वर्चस्व राखले.
प्रथम फलंदाजी करताना भारताने २० षटकांत ५ बाद २५५ धावांचा भक्कम डोंगर उभारला. सलामीवीर संजू सॅमसनने ४६ चेंडूंमध्ये ८९ धावांची आक्रमक खेळी करत संघाला भक्कम सुरुवात करून दिली. त्याला अभिषेक शर्मा (५२) आणि ईशान किशन (५४) यांनी मोलाची साथ दिली.
२२५ धावांच्या विशाल लक्ष्याचा पाठलाग करताना न्यूझीलंडची फलंदाजी सुरुवातीपासूनच दबावाखाली राहिली. भारतीय गोलंदाजांनी नियमित अंतराने बळी घेत सामन्यावर पकड मजबूत ठेवली. जसप्रीत बुमराहने ४ षटकांत केवळ १५ धावा देत ४ बळी घेत न्यूझीलंडच्या मधल्या फळीचा कणा मोडला.
न्यूझीलंडकडून टिम सायफर्टने ५२ धावांची झुंजार खेळी केली, मात्र भारतीय गोलंदाजांच्या शिस्तबद्ध माऱ्यासमोर उर्वरित फलंदाजांना मोठी भागीदारी उभारता आली नाही. अखेरीस न्यूझीलंडचा डाव १९ षटकांत १५९ धावांत संपुष्टात आला.
या निर्णायक कामगिरीसाठी जसप्रीत बुमराहला सामनावीराचा पुरस्कार देण्यात आला. संपूर्ण स्पर्धेत सातत्यपूर्ण फलंदाजी करणाऱ्या संजू सॅमसनला स्पर्धेतील सर्वोत्तम खेळाडू म्हणून गौरविण्यात आले.
या विजयासह भारताने टी-२० विश्वचषकातील तिसरे विजेतेपद पटकावले असून सलग दुसऱ्यांदा हा किताब जिंकण्याची कामगिरीही केली आहे.
दरम्यान, भारत आणि श्रीलंका यांच्या संयुक्त यजमानपदाखाली ७ फेब्रुवारी ते ८ मार्चदरम्यान झालेल्या या स्पर्धेत २० संघांनी सहभाग नोंदवला होता.
