२०२७ मध्ये स्वबळावर आप सरकार स्थापणार: अरविंद केजरीवाल
आम आदमी पार्टीचे राष्ट्रीय संयोजक व दिल्लीचे माजी मुख्यमंत्री अरविंद केजरीवाल शुक्रवारी गोव्यात दाखल झाले. दाबोळी विमानतळावर पक्षाचे पदाधिकारी व कार्यकर्त्यांनी हाताने लिहिलेल्या फलकांसह त्यांचे जल्लोषात स्वागत केले. घोषणाबाजी करत आप समर्थकांनी केजरीवाल यांचे स्वागत केले.
माध्यमांशी संवाद साधताना केजरीवाल यांनी राज्यातील भाजप सरकारवर टीका करत म्हणाले, “मागील १३ वर्षांपासून काँग्रेसच्या पाठबळावर भाजप गोव्यात सत्तेवर आहे; परंतु या कालावधीत जनतेला मूलभूत सुविधा मिळाल्या नाहीत. गेल्या १३ वर्षांत गोव्याला भाजप-काँग्रेसने दिले तरी काय? फक्त गुंडराज”.
रामा काणकोणकर प्रकरणाचा संदर्भ देत त्यांनी म्हटले की, राज्यातील कायदा-सुव्यवस्थेची स्थिती ढासळलेली आहे. हे एकच प्रकरण नाही. भाजप विरुद्ध बोलणाऱ्या लोकांना दडपले जाते. आज गोव्यातील नागरिक भयाच्या सावटाखाली जगत आहे”.
रोजगाराच्या संधींची कमतरता, महिलांवरील वाढते गुन्हे, तसेच बेकायदेशीर बांधकामांचा फैलाव यावर त्यांनी गंभीर चिंता व्यक्त केली. गोव्यातील नागरिकांना स्वस्त वीज, अखंडित पाणीपुरवठा आणि उत्तम दर्जेदार रस्ते यांसारख्या मूलभूत सोयी-सुविधा मिळणे आवश्यक असल्याचे त्यांनी अधोरेखित केले.
“भाजप व काँग्रेस या दोन्ही पक्षांनी गोव्याची निराशा केली आहे. आज जनतेसमोर केवळ ‘आप’ हा पर्याय शिल्लक आहे. २०२७ मध्ये आम आदमी पार्टी स्वबळावर सरकार स्थापन करील,” असा ठाम विश्वास केजरीवाल यांनी यावेळी व्यक्त केला.
