अखिल भारतीय कोंकणी परिषदेच्या २६ व्या अखिल भारतीय साहित्य संमेलनाचे अध्यक्ष म्हणून ज्येष्ठ कोंकणी कवी माधव बोरकर उर्फ वेणी माधव श्रीधर सिनाई बोरकार यांची एकमताने निवड करण्यात आली. परिषदेच्या नुकत्याच झालेल्या सर्वसाधारण सभेत हा निर्णय घेण्यात आला. साहित्य संमेलन २२ आणि २३ नोव्हेंबर रोजी केरळमधील एर्नाकुलम येथे ए जे सभागृहात होणार आहे.
माधव बोरकार यांचे कोंकणी कवितेच्या क्षेत्रात मोठे योगदान आहे. त्यांचे आतापर्यंत चंवर, वताच्यो सावळ्यो, उजवाडाचो रूख, पर्जळाचें दार, यमन, अव्यक्ताचीं गाणी, सिंफनी, मळबाचें जनेल, सुकृत फुलां असे कवितासंग्रह प्रकाशित झाले आहेत. त्यांनी कोंकणी साहित्यिक पांडुरंग भांगी आणि मनोहरराय सरदेसाय यांच्या जीवनावर पुस्तके देखील लिहिली आहेत. रवींद्रनाथ टागोरांच्या कवितांचे कोंकणीमध्ये भाषांतर केले आहे. ते सातत्याने कवितेच्या क्षेत्रात तरुणांना मार्गदर्शन करतात.
माधव बोरकार यांच्या कवितासंग्रह “यमन” या पुस्तकाला साहित्य अकादेमी पुरस्कार तसेच साहित्य अकादेमी अनुवाद पुरस्कार मिळाला आहे. याशिवाय, कोंकणी भाषा मंडळ, टी.एम.ए पै पुरस्कार, विश्व कोंकणी केंद्राचा विमला पै पुरस्कार, गोवा राज्य सांस्कृतिक पुरस्कार आणि गोवा कोंकणी अकादेमी कोंकणी भाषा सेवा पुरस्काराने त्यांना सन्मानित करण्यात आले आहे. त्यांनी आकाशवाणीवर स्टेशन डायरेक्टर म्हणून काम केले आहे. ते गोवा कोंकणी अकादमीचे माजी अध्यक्ष आहेत.
दरम्यान, केरळमधील कोंकणी संघटनांनी संयुक्तपणे साहित्य संमेलनाचे आयोजन करण्याची जबाबदारी घेतली आहे. परिषदेला उपस्थित राहू इच्छिणाऱ्या प्रतिनिधींनी नोंदणी सुरू केली आहे.
आयोजकांनी दोन रात्रींसाठी निवास आणि नाश्ता-जेवणाची व्यवस्था केली आहे. तथापि, प्रवास खर्च आणि व्यवस्था प्रतिनिधींना करावा लागेल. नोंदणीसाठी गुगल फॉर्म – https://docs.google.com/forms/d/e/1FAIpQLSf1rSeS_5EXQahSN9moeUwI-uX40zeLIKu8J8WTX3KYTMbgHQ/viewform?usp=header
अधिक माहितीसाठी, संपर्क साधा – चेतन आचार्य, कार्याध्यक्ष, कोंकणी परिषद – 8830103768 / 9422389290 किंवा स्नेहा सबनीस, सचिव, कोंकणी परिषद – 9923633789.
