Molbio Diagnostics चा नफा दमदार; Q1 मध्ये 6.24 कोटी Truenat टेस्ट-किटची विक्री

पणजी: पॉइंट-ऑफ-केअर डायग्नोस्टिक्स क्षेत्रातील Molbio Diagnostics Ltd.ने आर्थिक वर्ष २०२७ची दमदार सुरुवात केली आहे. जून २०२६अखेरच्या पहिल्या तिमाहीत कंपनीचे एकूण उत्पन्न ४११.४८ कोटी रुपये झाले. मागील आर्थिक वर्षाच्या याच तिमाहीत कंपनीचे उत्पन्न १००.४७ कोटी रुपये होते. Truenat टेस्ट-किटच्या विक्रीतील वाढीमुळे कंपनीच्या महसुलाला मोठी चालना मिळाल्याचे व्यवस्थापनाने म्हटले आहे.

कंपनीचे EBITDA यंदाच्या पहिल्या तिमाहीत १०३.६८ कोटी रुपये राहिले. गेल्या वर्षीच्या याच तिमाहीत कंपनीला १४.५० कोटी रुपयांचा EBITDA तोटा झाला होता. EBITDA मार्जिनही उणे १४.४३ टक्क्यांवरून यंदा २५.२० टक्क्यांवर पोहोचले.

नफ्याच्या पातळीवरही कंपनीने मोठी सुधारणा नोंदवली. Q1 FY27 मध्ये कंपनीचा करानंतरचा नफा (PAT) ५२.७४ कोटी रुपये झाला. Q1 FY26 मध्ये कंपनीला २३.९४ कोटी रुपयांचा तोटा झाला होता. यंदाच्या तिमाहीत PAT मार्जिन १२.८२ टक्के राहिले.

Truenat टेस्ट-किटच्या विक्रीत मोठी वाढ

कंपनीच्या व्यवसायातील प्रमुख उत्पादन असलेल्या Truenat टेस्ट-किटच्या विक्रीत लक्षणीय वाढ झाली. जूनअखेरच्या तिमाहीत ६.२४ दशलक्ष म्हणजेच ६४.२४ लाख टेस्ट-किट्स विकल्या गेल्या. मागील वर्षाच्या याच तिमाहीत ही संख्या ०.७९ दशलक्ष होती.

दरम्यान, या तिमाहीत १६४ Truenat उपकरणांची विक्री झाली. Q1 FY26 मध्ये २१६ आणि Q4 FY26 मध्ये १,१५८ उपकरणे विकली गेली होती. कंपनीच्या मते, जगभरातील ९० हून अधिक देशांमध्ये १२,५००पेक्षा अधिक Truenat उपकरणे विकली गेली असून, त्यावर होणाऱ्या टेस्ट-किटच्या वापरामुळे कंपनीच्या व्यवसायाला सातत्याने चालना मिळत आहे.

Q1 FY27 मधील कंपनीच्या महसुलात देशांतर्गत व्यवसायाचा वाटा ८३.५२ टक्के, तर निर्यातीचा वाटा १६.४८ टक्के होता.

अतिरिक्त क्षमतेचा वापर करून वाढीवर भर

कंपनीचे कार्यकारी संचालक आणि मुख्य कार्यकारी अधिकारी श्रीराम नटराजन यांनी सांगितले की, आर्थिक वर्ष २०२७मध्ये कंपनीकडे उत्पादन वाढविण्यासाठी पुरेशी अतिरिक्त क्षमता उपलब्ध आहे. आर्थिक वर्ष २०२६मध्ये उपकरण उत्पादन क्षमतेचा वापर ४२ टक्के, तर टेस्ट-किट क्षमतेचा वापर ५८ टक्के होता. त्यामुळे नजीकच्या काळात मोठ्या अतिरिक्त भांडवली खर्चाशिवाय व्यवसाय वाढविण्याची संधी असल्याचे त्यांनी म्हटले.

Truenat प्लॅटफॉर्मसाठी २२ आजारांशी संबंधित आणखी ३४ चाचण्यांची पाइपलाइन नियोजनानुसार पुढे जात असल्याचे नटराजन यांनी सांगितले. संसर्गजन्य आजारांबरोबरच ऑन्कोलॉजी आणि अन्य असंसर्गजन्य आजारांच्या निदान क्षेत्रात विस्तार करण्याची कंपनीची योजना आहे.

आफ्रिका, आशिया आणि लॅटिन अमेरिकेवर लक्ष

आंतरराष्ट्रीय बाजारपेठेत आफ्रिका आणि आग्नेय आशियातील व्यवसाय मजबूत करण्याबरोबरच लॅटिन अमेरिकेत प्रवेश करण्यावर कंपनीचा भर आहे. विकसित बाजारपेठांमध्ये नियामक मंजुरी मिळविण्याची प्रक्रियाही सुरू असून, CTNG टेस्टसाठी CE-IVDR प्रक्रियेचा त्यात समावेश असल्याचे कंपनीने म्हटले आहे.

१७ ऑगस्ट २०२६ रोजी शेअर बाजारात सूचीबद्ध झालेल्या Molbio Diagnosticsने सार्वजनिक इश्यूमधून मिळालेल्या निव्वळ निधीचा वापर ऑटोमेशनसाठीच्या भांडवली खर्चासह बेंगळुरूमध्ये R&D सुविधा उभारण्यासाठी सुरू केल्याचे व्यवस्थापनाने सांगितले.

दरम्यान, Q4 FY26 मधील सुमारे ५७ कोटी रुपयांच्या काही निर्यात ऑर्डर्स आखाती प्रदेशातील परिस्थितीमुळे पुढे ढकलल्या गेल्या होत्या. या ऑर्डर्स Q1 FY27 मध्ये महसुलात नोंदवल्या गेल्याचे नटराजन यांनी स्पष्ट केले. त्यामुळे कंपनीची कामगिरी केवळ एका तिमाहीऐवजी संपूर्ण आर्थिक वर्षाच्या आधारावर पाहणे अधिक योग्य ठरेल, असेही त्यांनी नमूद केले.