सणासुदीत महागाईचा ‘शॉक’ : प्रभव नायक
मडगाव : सणासुदीच्या काळात एलपीजी व वीजदर वाढवून सरकारने सामान्य नागरिकांवर अन्याय केला असून हे निर्णय जनविरोधी असल्याचा आरोप मडगांवचो आवाज व युवा नेते प्रभव नायक यांनी केला आहे.
प्रभव नायक यांनी सांगितले की, गेल्या दिवाळीत गोमंतकीयांना सरकारकडून एलपीजी दरवाढीची “भेट” मिळाली होती. यंदा रावणाच्या प्रतीकात्मक वधाच्या पूर्वसंध्येला सरकारने नवा राक्षस “महागाईसूर” आणला आहे. व्यापारी एलपीजी सिलिंडरचे दर तब्बल रु. १५.५० नी वाढवण्यात आले असून त्यामुळे आधीच अडचणीत असलेल्या छोटे व्यवसाय व खानावळींचे खर्च अधिकच वाढणार आहेत.
याशिवाय आजपासून गोव्यात वीजदरात वार्षिक ४ टक्क्यांची वाढ लागू झाली आहे. या सातत्यपूर्ण वाढीमुळे घरगुती बजेट आणखी कोलमडणार असून सण-उत्सवातही कुटुंबांना आनंद व सुख मिळणार नाही, असे प्रभव नायक यांनी नमूद केले.
“सण-उत्सव म्हणजे लोकांच्या जीवनात आनंद व प्रकाश आणणारे क्षण असतात. परंतु हे सरकार सततच्या दरवाढीने व वाढत्या खर्चामुळे लोकांच्या जीवनात अंधार पसरवत आहे,” असा टोला प्रभव नायक यांनी हाणला.
मडगांवचो आवाजने सरकारला तातडीने हे जनविरोधी निर्णय मागे घेण्याची मागणी केली असून, उत्सवांच्या काळात जेथे चांगल्याचा वाईटावर, प्रकाशाचा अंधारावर विजय साजरा केला जातो तेथे जनतेला दिलासा देणे सरकारचे कर्तव्य असल्याचे म्हटले आहे.
