रेल्वेने केला अमित पाटकर यांचा व्हील लोडर जप्त?
वेळसाव : खासगी जागेवर रेल्वेकडून कथितरीत्या टाकण्यात आलेली खडी हटविण्यासाठी वापरण्यात आलेला व्हील लोडर भारतीय रेल्वेने जप्त केल्याचा दावा प्रदेश काँग्रेसचे माजी अध्यक्ष अमित पाटकर यांनी केला आहे. या कारवाईची माहिती पाटकर यांनी दिली असून, रेल्वे प्रशासनाच्या भूमिकेवर त्यांनी प्रश्नचिन्ह उपस्थित केले आहे.
पाटकर यांच्या माहितीनुसार, वेलसाव येथील खासगी मालमत्तेवर रेल्वेकडून कथितरीत्या खडी टाकण्यात आली होती. त्यामुळे मालमत्तेचा प्रवेशमार्ग अडथळित झाल्याने हा अडथळा दूर करण्यासाठी त्यांच्या मालकीच्या व्हील लोडरचा वापर करण्यात आला. मात्र, खडी हटविण्यासाठी वापरण्यात आलेली हीच यंत्रसामग्री रेल्वेकडून जप्त करण्यात आल्याचे पाटकर यांनी म्हटले आहे.
“खासगी मालमत्तेवर झालेला कथित अतिक्रमणाचा किंवा प्रवेशातील अडथळ्याचा प्रश्न सोडविण्याऐवजी अडथळा दूर करणाऱ्या यंत्रसामग्रीवरच कारवाई का?” असा सवाल पाटकर यांनी उपस्थित केला आहे.
रेल्वे प्रशासन आपल्या अधिकारांचा वापर करून खासगी मालमत्ताधारकांच्या हक्कांसाठी आवाज उठविणाऱ्यांवर दबाव आणत आहे का, असा प्रश्नही त्यांनी उपस्थित केला आहे.
या प्रकरणामुळे खासगी मालमत्तेचे संरक्षण, प्रवेशाचा अधिकार आणि रेल्वे प्रशासनाच्या अधिकारांचा वापर याबाबत चर्चा सुरू झाली आहे. पाटकर यांनी दिलेल्या माहितीनुसार, हे प्रकरण केवळ एका यंत्रसामग्रीच्या जप्तीपुरते मर्यादित नसून, खासगी मालमत्ताधारकांच्या हक्कांशी संबंधित असल्याचा दावा करण्यात आला आहे.
