सिनेनामा 

IFFI 2026 : गोव्याच्या १२ चित्रपटांचा विशेष विभाग; ​ कोंकणी-मराठी सिनेमाला आंतरराष्ट्रीय व्यासपीठ

पणजी : गोव्याचे सांस्कृतिक जीवन, स्थानिक समाजव्यवस्था, कौटुंबिक नाती आणि मानवी भावभावना यांचे दर्शन घडवणाऱ्या १२ गोमंतकीय चित्रपटांचा विशेष विभाग ५७ व्या भारतीय आंतरराष्ट्रीय चित्रपट महोत्सवात (इफ्फी) समाविष्ट करण्यात आला आहे. कोकणी आणि मराठी भाषांतील लघुपट तसेच पूर्ण लांबीच्या चित्रपटांचा या विभागात समावेश असून, २१ ते २८ नोव्हेंबरदरम्यान पणजीतील इनॉक्स चित्रपटगृहात त्यांचे प्रदर्शन होणार आहे.

गोव्याची ओळख प्रामुख्याने समुद्रकिनारे, पर्यटन आणि समृद्ध सांस्कृतिक वारसा यांच्याशी जोडली जाते. मात्र, या चित्रपटांच्या माध्यमातून गोव्याच्या दैनंदिन जीवनातील अनुभव, स्थानिक माणसांच्या कहाण्या आणि समाजातील बदलते वास्तव प्रेक्षकांसमोर येणार आहे. कौटुंबिक संघर्ष, ओळख, बालपण, एकटेपणा, सामाजिक प्रश्न आणि वैयक्तिक संघर्ष अशा विविध विषयांचा या चित्रपटांतून वेध घेण्यात आला आहे.

या निवडीत मंगिरीश जे. बांदोडकर दिग्दर्शित ‘अन्सेसांव’, वर्धन  कामत यांचा ‘उमेश’, प्रसाद एम. नाईक यांचा ‘शकुंतला’, श्रवण काणकोणकर यांचा ‘पूर्णता’ आणि सुविदा तोरगल बाखले यांचा ‘नॉइज’ या कोकणी चित्रपटांचा समावेश आहे. याशिवाय किशोर अर्जुन दिग्दर्शित  लघुपट ‘दर्या’ही या विभागात दाखवला जाणार आहे.

‘दर्या’मध्ये सेरेब्रल पाल्सी असलेल्या आणि दृष्टिहीन आकाश या मुलाची कथा मांडण्यात आली आहे. समुद्र कधीही न पाहिलेल्या आकाशला त्याच्याविषयी केवळ गोष्टी, आवाज आणि कल्पनेतून माहिती असते. आजोबा त्याला समुद्रकिनारी घेऊन जातात आणि त्याच्या दीर्घकाळच्या स्वप्नातील जगाचा अनुभव देतात. पाहणे म्हणजे केवळ डोळ्यांनी दृश्य अनुभवणे नव्हे, हा संवेदनशील विचार चित्रपटातून मांडण्यात आला आहे.

या विभागातील अन्य चित्रपटांमध्ये संकल्प साईनाथ परब दिग्दर्शित ‘परफेक्ट शॉट’, कृषा राऊळ यांचा ‘बापो काळे’, अखिल लोटलीकर यांचा ‘वुडवर्म (रोटो)’ आणि अनुराग वेरडेकर यांचा ‘चिअर्स!’ या कोकणी चित्रपटांचा समावेश आहे. जय आमोणकर दिग्दर्शित ‘मीडियम पीस’ हा मराठी चित्रपटही या निवडीत आहे. अनूप सरदेसाई दिग्दर्शित ‘हेल्थ सेंटर’ हा पूर्ण लांबीचा कोकणी चित्रपट या विभागातील आणखी एक महत्त्वाचा चित्रपट आहे.

या चित्रपटांचे विषय आणि मांडणी वेगवेगळी असली, तरी स्थानिक अनुभवांतून सार्वत्रिक मानवी भावना व्यक्त करणे, हा त्यांच्यातील समान धागा आहे. कोकणी आणि मराठी भाषांतील चित्रपटांना आंतरराष्ट्रीय महोत्सवाच्या व्यासपीठावर स्थान मिळाल्याने गोव्यातील चित्रपटकर्मींना आपले काम व्यापक प्रेक्षकांपर्यंत पोहोचवण्याची संधी मिळणार आहे.

२० ते २८ नोव्हेंबरदरम्यान आयोजित ५७ व्या इफ्फीची यंदाची संकल्पना ‘स्टोरीज विदाऊट बॉर्डर्स’ अशी आहे. भौगोलिक, भाषिक आणि सांस्कृतिक सीमा ओलांडून कथा प्रेक्षकांना जोडू शकतात, हा या संकल्पनेचा आशय आहे. त्या पार्श्वभूमीवर गोव्याच्या स्थानिक कथा जागतिक प्रेक्षकांसमोर आणणारा हा विशेष चित्रपट विभाग महत्त्वाचा ठरतो.

Show More

Related Articles

Leave a Reply

Your email address will not be published. Required fields are marked *

Back to top button
Don`t copy text!