#boycot Maldives : का केल्या EaseMyTrip कडून सर्व बूकिंग्स रद्द?

मालदीवमधील सत्ताधारी पक्षाचे नेते झाहिद रमीझ यांनी पंतप्रधान मोदींच्या लक्षद्वीप दौऱ्यावर टीका केली होती. रमीझ म्हणाले होते, भारत पैसे कमावण्यासाठी श्रीलंका आणि इतर लहान देशांच्या अर्थव्यवस्थेची नक्कल करतोय, ही खेदाची बाब आहे. लक्षद्वीपचं पर्यटन तुम्हाला वाढवायचं आहे हे मान्य. परंतु, ही भ्रामक कल्पना आहे. आम्ही (मालदीव) ज्या प्रकारे सेवा पुरवतो, तशी सेवा तुम्ही लक्षद्वीपमध्ये देऊ शकता का? तुम्ही स्वच्छता पाळू शकता का? तिथल्या हॉटेलच्या खोल्यांमध्ये एकप्रकारचा वास येतो, त्याचं तुम्ही काय करणार आहात?

त्यापाठोपाठ मालदीवच्या युवा सक्षमीकरण, माहिती आणि कला विभागाच्या उपमंत्री मरियम शिउन यांनी थेट पंतप्रधान नरेंद्र मोदी यांच्या फोटोंवर कमेट करत त्यांना ‘विदूषक’ आणि ‘इस्रायलची कठपुतली’ संबोधलं होतं. यासह मालदीवमधील काही मंत्र्यांनी भारतीयांवर वर्णद्वेषी टिप्पण्या केल्या होत्या.

Maldives सरकारने स्पष्ट केली भूमिका?

दरम्यान, भारत सरकारने रविवारी हा मुद्दा मालदीवच्या मोहम्मद मुइज्जू सरकारसमोर उपस्थित केला. मालदीवमधील भारताच्या उच्चायुक्तांनीदेखील तिथल्या मंत्र्यांच्या टिप्पण्यांवर तीव्र नाराजी व्यक्त केली. त्यानंतर मालदीव सरकारने अधिकृत निवेदन जारी करत म्हटलं आहे की, आमच्या मंत्र्यांनी केलेली व्यक्तव्ये ही त्यांची वैयक्तिक आहेत. मालदीव सरकारचा त्याच्याशी संबंध नाही. यावर मालदीवचे माजी राष्ट्रपती इब्राहिम मोहम्मद सोलिह यांनीदेखील प्रतिक्रिया दिली आहे. सोलिह म्हणाले, मालदीव सरकारमधील मंत्र्यांनी समाजमाध्यमांवर भारताविरोधात वापरलेल्या द्वेषपूर्ण भाषेचा मी निषेध करतो.

मालदीव सरकारचे प्रवक्ते आणि मंत्री इब्राहिम खलील यांनी सांगितलं की, वादग्रस्त वक्तव्ये करणाऱ्या तीन मंत्र्यांना त्यांच्या पदावरून तात्काळ निलंबित करण्यात आलं आहे. मरियम शिउना यांच्यासह मालशा शरीफ आणि महजून माजिद यांच्यावर निलंबनाची कारवाई करण्यात आली आहे.