![nitin gadkari](https://rashtramat.com/wp-content/uploads/2024/03/nitin_gadkari-780x470.jpg)
महामार्ग दरडींच्या घटनांची अधिकाऱ्यांकडून चौकशी !
राष्ट्रीय महामार्गावर दरड कोसळण्याच्या घटनांची अधिकाऱ्यांकडून चौकशी केली जाणार आहे. चौकशीत दोषी आढळणाऱ्यांवर कारवाई केली जाईल, असे आश्वासन केंद्रीय रस्ते वाहतूक आणि महामार्ग मंत्री नितीन गडकरी यांनी दिले आहे. राष्ट्रीय महामार्गाच्या कामात काही उणिवा असतील तर त्या दूर करून त्या सुधारल्या जातील, असे त्यांनी सांगितले.
मंत्री नितीन गडकरी यांच्या हस्ते गुरुवारी संध्याकाळी मोपा लिंक रोडचे उद्घाटन करण्यात आले. या कार्यक्रमात नितीन गडकरी यांनी हे आश्वासन दिले. रस्ते वाहतूक आणि महामार्ग मंत्रालय येत्या काळात गोव्यात २५ ते ३० हजार कोटी रुपयांची कामे करणार आहे.
मोपा लिंक रोडवर चालणाऱ्या टॅक्सींना टोल भरावा लागणार आहे. मंत्री गडकरी यांनी टॅक्सी चालक आणि पेडणे येथील नागरिकांना टोलमध्ये काही सूट देण्याचे आश्वासन दिले आहे. — प्रमोद सावंत, मुख्यमंत्री
केंद्रीय मंत्री श्रीपाद नाईक, मुख्यमंत्री डॉ. प्रमोद सावंत, परिवहन मंत्री माविन गुदिन्हो, वीज मंत्री सुदिन ढवळीकर, आमदार प्रवीण आर्लेकर, राज्यसभा खासदार सदानंद शेट तानावडे आदी मान्यवर यावेळी उपस्थित होते.
न्हयबाग, धारगळ, पेडे या अपघातप्रवण भागात अंडरपास मंजूर झाले आहेत. ग्रामीण भागात संपर्क वाढवला जाईल. ग्रामीण भागात संपर्क वाढवण्यासाठी रिंगरोड बांधण्याचा प्रस्ताव आहे. दाबोळी विमानतळ कोणत्याही परिस्थितीत बंद होणार नाही. मोपा विमानतळाचा वापर वाढवण्यासाठी विमानतळाला रेल्वे स्थानकाशी जोडण्याचा प्रस्ताव आहे, असे गडकरी यांनी सांगितले.
दोन्ही विमानतळ खुली राहतील : गुदिन्हो
गोव्याच्या विकासात केंद्रीय मंत्री नितीन गडकरी यांचा मोलाचा वाटा आहे. केंद्रीय मंत्री नितीन गडकरी यांच्या नेतृत्वाखाली राज्यात रस्ते आणि महामार्ग बांधले जात आहेत. राज्याला दाबोळी आणि मोपा या दोन्ही विमानतळांची गरज आहे. दोन्ही विमानतळ खुली राहतील, असे परिवहन मंत्री माविन गुदिन्हो यांनी सांगितले.
मुंबई-गोवा महामार्ग सर्वात वर्दळीचा आहे. वाहतुकीमुळे प्रदूषण वाढते. यावर उपाय म्हणून ६,००० कोटी रुपये खर्चून ईस्टर्न बायपास बांधण्यात येणार आहे. ईस्टर्न बायपास पुन्हा सुरू झाल्यानंतर मुंबई-गोवा महामार्गावरील प्रदूषण कमी होईल, असा विश्वास गडकरी यांनी व्यक्त केला.