टाटा पॉवरचा विक्रमी तिमाही नफा; दुसऱ्या तिमाहीत १,६५२ कोटींचा करपश्चात नफा
नवी दिल्ली : टाटा समूहातील आघाडीची एकात्मिक वीज कंपनी असलेल्या टाटा पॉवरने आर्थिक वर्ष २०२६-२७ च्या दुसऱ्या तिमाहीत आतापर्यंतचा सर्वोच्च १,६५२ कोटी रुपयांचा करपश्चात नफा (पीएटी) नोंदवला आहे. मागील वर्षाच्या याच तिमाहीच्या तुलनेत नफ्यात ३३ टक्क्यांची वाढ झाली आहे. कंपनीने या तिमाहीत १९,८८६ कोटी रुपयांचा महसूल आणि ४,२४५ कोटी रुपयांचा ईबीआयटीडीए नोंदवला. महसुलात २६ टक्के, तर ईबीआयटीडीएमध्ये ५ टक्के वाढ झाली आहे.
आर्थिक वर्षाच्या पहिल्या सहामाहीतही कंपनीने विक्रमी कामगिरी कायम ठेवली. एप्रिल ते सप्टेंबर २०२६ या कालावधीत करपश्चात नफा २२ टक्क्यांनी वाढून ३,०५३ कोटी रुपयांवर पोहोचला. या काळात कंपनीचा महसूल १७ टक्क्यांनी वाढून ३८,७८४ कोटी रुपये, तर ईबीआयटीडीए ७ टक्क्यांनी वाढून ८,४९४ कोटी रुपये झाला. वीजनिर्मिती, अक्षय ऊर्जा, पारेषण आणि वितरण यांसह विविध व्यवसायांतील सुधारित कामगिरीमुळे ही वाढ साध्य झाल्याचे कंपनीने प्रसिद्धिपत्रकात म्हटले आहे.
भविष्यातील विस्तार आणि देशाच्या वाढत्या ऊर्जेच्या गरजा पूर्ण करण्याच्या दृष्टीने टाटा पॉवरने पहिल्या सहामाहीत सुमारे १० हजार कोटी रुपयांची भांडवली गुंतवणूक केली आहे. ही कंपनीच्या सहामाहीतील आतापर्यंतची सर्वोच्च गुंतवणूक आहे. यापैकी सुमारे ६ हजार कोटी रुपये अक्षय ऊर्जा क्षेत्रात गुंतवण्यात आले आहेत. पारेषण पायाभूत सुविधा, पंप्ड स्टोरेज प्रकल्प आणि वीज वितरण नेटवर्कच्या विस्तारालाही प्राधान्य देण्यात आले आहे.
कंपनीच्या अक्षय ऊर्जा व्यवसायाने नफावाढीत महत्त्वाची भूमिका बजावली आहे. गेल्या १२ महिन्यांत १.४ गिगावॅट क्षमतेची भर घालण्यात आली असून, मोठ्या सौर व पवन ऊर्जा प्रकल्पांसह रूफटॉप सोलर क्षेत्रातही कंपनीने विस्तार केला आहे. पहिल्या सहामाहीत ७६५ मेगावॅट स्वच्छ आणि हरित वीजनिर्मिती क्षमता कार्यान्वित करण्यात आली. त्यामुळे कंपनीची एकूण स्थापित स्वच्छ आणि हरित ऊर्जा क्षमता ८.६ गिगावॅट झाली आहे.
सौर उत्पादन क्षेत्रातही कंपनीने चांगली कामगिरी नोंदवली. दुसऱ्या तिमाहीत ०.९ गिगावॅट सौर सेल्स आणि १ गिगावॅट सौर मॉड्यूल्सचे उत्पादन करण्यात आले. पहिल्या सहामाहीत हे उत्पादन अनुक्रमे १.८ आणि २ गिगावॅट होते. मॉड्यूल उत्पादनात ९७ टक्के यील्ड साध्य करण्यात आले. दरम्यान, रूफटॉप सोलर क्षेत्रात दुसऱ्या तिमाहीत ४२६ मेगावॅटपी क्षमतेची स्थापना करण्यात आली असून, एकूण स्थापित क्षमता ५.१२ गिगावॅटपीवर पोहोचली आहे.
पारेषण आणि वितरण व्यवसायातही कंपनीने विस्तार केला आहे. कार्यरत पारेषण नेटवर्क ७,८९४ सर्किट किलोमीटरपर्यंत पोहोचले असून, विविध वितरण कंपन्यांमध्ये ६० लाखांहून अधिक स्मार्ट मीटर बसवण्यात आले आहेत. ओडिशातील वीज वितरण कंपन्यांनीही परिचालन कार्यक्षमतेत सुधारणा नोंदवली आहे. तेथील एटी अँड सी वीज वितरण नुकसान २१ टक्क्यांपर्यंत कमी झाले आहे.
ऊर्जा साठवणूक क्षेत्रातही कंपनीने महत्त्वाचे पाऊल उचलले आहे. मुंबईत ६० मेगावॅट-तास क्षमतेचा बॅटरी ऊर्जा साठवणूक प्रकल्प कार्यान्वित करण्यात आला आहे. यामुळे अक्षय ऊर्जेचा वापर वाढवणे आणि वीज ग्रीडची स्थिरता मजबूत करण्यास मदत होणार आहे. महाराष्ट्रातील १,००० मेगावॅट क्षमतेच्या भिवपुरी पंप्ड स्टोरेज प्रकल्पाचे कामही नियोजनानुसार सुरू आहे. या प्रकल्पातून ३२४ मेगावॅट वीजपुरवठ्यासाठी सोलर एनर्जी कॉर्पोरेशन ऑफ इंडिया (एसईसीआय)कडून कंपनीला स्वीकृतीपत्र (एलओए) मिळाले आहे.
कंपनीचे मुख्य कार्यकारी अधिकारी आणि व्यवस्थापकीय संचालक डॉ. प्रवीर सिन्हा यांनी सांगितले की, सर्व व्यवसायांकडून मिळालेल्या योगदानामुळे कंपनीने आतापर्यंतचा सर्वोच्च तिमाही नफा नोंदवला आहे. अक्षय ऊर्जा, रूफटॉप सोलर, ऊर्जा साठवणूक आणि ग्राहक-केंद्रित उपाययोजना कंपनीच्या वाढीला गती देत आहेत. पहिल्या सहामाहीत केलेली १० हजार कोटी रुपयांची भांडवली गुंतवणूक स्वच्छ ऊर्जा क्षमता वाढवणे, पारेषण नेटवर्कचा विस्तार आणि डिजिटल वीज वितरण पायाभूत सुविधा मजबूत करण्यासाठी उपयोगी ठरणार आहे.
