व्लादिमीर पुतिन यांना हृदयविकाराचा झटका
रशियाचे राष्ट्राध्यक्ष व्लादिमीर पुतिन यांना हृदयविकाराचा झटका आल्याच्या वृत्ताने खळबळ उडाली आहे. मॉस्कोच्या स्थानिक वेळेनुसार, रविवारी रात्री नऊच्या सुमारास व्लादिमीर पुतिन हे त्यांच्या बेडरुममध्ये खाली पडलेल्या अवस्थेत आढळून आले आहेत. जमिनीवर कोसळण्यापूर्वी पुतिन यांनी जेवणाच्या टेबलवरील काही वस्तू फरशीवर पाडल्या, या आवाजामुळेच सुरक्षा रक्षकांनी बेडरुमकडे धाव घेतल्याचं बोललं जात आहे, याबाबतचं वृत्त टेलिग्रामवरील एका चॅनेलने दिलं आहे.
पुतिन यांना हृदयविकाराचा झटका आल्याचं वृत्त समोर येताच सर्वत्र खळबळ उडाली आहे. पुतिन यांच्यावर सध्या विशेष अतिदक्षता विभागात उपचार केले जात आहेत, अशी माहिती टेलिग्राम चॅनेल ‘जनरल एसव्हीआर’ने दिली आहे. हे चॅनेल रशियाचे माजी लेफ्टनंट जनरल यांच्याद्वारे चालवलं जातं. ते नियमितपणे रशियाचे राष्ट्राध्यक्ष पुतिन यांच्या आरोग्यावर भाष्य करतात. यापूर्वी पुतीन गंभीर आजारी असल्याचं वृत्तही या चॅनेलने दिलं होतं.
संबंधित टेलिग्राम चॅनेलने दावा केला की, पुतिन यांना हृदयविकाराचा झटका आल्यानंतर त्यावेळी सेवेवर असणाऱ्या डॉक्टरांनी त्यांना तातडीने शुद्धीवर आणलं. त्यांना वेळेवर वैद्यकीय मदत पुरवली. मॉस्कोच्या स्थानिक वेळेनुसार रविवारी रात्री ९ च्या सुमारास राष्ट्राध्यक्षांच्या सुरक्षा रक्षकांनी पुतिन यांच्या बेडरुममधून वस्तू पडल्याचा आवाज ऐकला. यानंतर दोन सुरक्षा अधिकाऱ्यांनी तत्काळ पुतिन यांच्या बेडरूमकडे धाव घेतली. यावेळी पुतीन हे बेडच्या शेजारी फरशीवर पडलेल्या अवस्थेत आढळले. तसेच बाजूला खाण्या-पिण्याचे टेबल उलटवल्याचंही आढळून आलं.
कदाचित, व्लादिमीर पुतिन यांनी जमिनीवर कोसळताना धक्क्याने टेबलवरील भांडी खाली पडली. ज्यामुळे बेडरूममध्ये आवाज झाला आणि सुरक्षारक्षक धावत आले. यानंतर निवासस्थानी कर्तव्यावर असलेल्या डॉक्टरांनी तातडीने शेजारील एका खोलीत पुतिन यांच्यावर उपचार केले. सध्या त्यांच्यावर विशेष अतिदक्षता विभागात उपचार सुरू असल्याचं बोललं जात आहे.
