‘पद्मभूषण’ स्वीकारल्यानंतर ‘काय’ बोलले ममुट्टी?
मुंबई : ज्येष्ठ अभिनेते ममूटी यांना पद्मभूषण पुरस्काराने सन्मानित करण्यात आल्यानंतर त्यांनी केंद्र सरकारचे आभार मानत हा सन्मान आपल्या चाहत्यांना आणि चित्रपटसृष्टीला समर्पित केला आहे. पाच दशकांहून अधिक काळाच्या अभिनय कारकिर्दीचा हा गौरव असल्याची भावना त्यांनी व्यक्त केली.
सामाजिक माध्यमांवर प्रसिद्ध केलेल्या संदेशात ममूटी म्हणाले, “पद्मभूषण सन्मान मिळाल्याने मी अत्यंत नम्र आणि भारावून गेलो आहे. या प्रतिष्ठेच्या सन्मानासाठी भारत सरकारचे मनःपूर्वक आभार.”
आपल्या दीर्घ कारकिर्दीचा आढावा घेताना त्यांनी या यशामागे प्रेक्षकांचे प्रेम, विश्वास आणि पाठिंबा असल्याचे नमूद केले. “हा सन्मान म्हणजे माझ्या पाच दशकांच्या प्रवासाचे प्रतिबिंब आहे. माझ्या प्रेक्षकांच्या प्रेमाशिवाय आणि पाठिंब्याशिवाय हा प्रवास शक्य झाला नसता. दररोज मला प्रेरणा देणाऱ्या सर्व चाहत्यांचे मी मनःपूर्वक आभार मानतो,” असे त्यांनी म्हटले.
भारतीय चित्रपटसृष्टीतील सर्वाधिक मान्यता प्राप्त अभिनेत्यांपैकी एक असलेल्या ममूटी यांनी मलयाळमसह हिंदी, तमिळ, तेलुगू आणि कन्नड चित्रपटांतही उल्लेखनीय भूमिका साकारल्या आहेत. चारशेहून अधिक चित्रपटांमधील त्यांच्या अभिनयाने भारतीय सिनेमावर ठसा उमटवला आहे.
“हा सन्मान मी सुंदर अशा चित्रपटविश्वाला आणि माझ्यावर प्रेम करणाऱ्या सर्व प्रेक्षकांना अर्पण करतो,” असेही त्यांनी आपल्या संदेशात नमूद केले.
देशातील तिसऱ्या क्रमांकाचा सर्वोच्च नागरी सन्मान असलेल्या पद्मभूषण पुरस्काराने ममूटी यांना गौरवण्यात आल्याने चित्रपटसृष्टीतून आणि चाहत्यांकडून आनंद व्यक्त केला जात आहे. भारतीय सिनेमातील त्यांच्या दीर्घ आणि उल्लेखनीय योगदानाची ही योग्य दखल असल्याची प्रतिक्रिया अनेकांनी व्यक्त केली आहे.
