IFFI 2026 : आंतरराष्ट्रीय चित्रपट स्पर्धेच्या ज्युरीचे नेतृत्व आनंद एल. राय यांच्याकडे
पणजी : गोव्यात २० ते २८ नोव्हेंबरदरम्यान आयोजित होणाऱ्या ५७व्या आंतरराष्ट्रीय भारतीय चित्रपट महोत्सवाच्या (इफ्फी) आंतरराष्ट्रीय चित्रपट स्पर्धेसाठी ज्युरी सदस्यांची घोषणा करण्यात आली आहे. प्रसिद्ध हिंदी चित्रपट दिग्दर्शक आणि निर्माते आनंद एल. राय यांची ज्युरीचे अध्यक्ष म्हणून नियुक्ती करण्यात आली आहे. भारतासह कोलंबिया, थायलंड, अर्जेंटिना आणि रोमानिया या देशांतील चित्रपट क्षेत्रातील मान्यवरांचा या आंतरराष्ट्रीय ज्युरीमध्ये समावेश आहे.
केंद्रीय माहिती आणि प्रसारण मंत्रालय तसेच इफ्फीच्या अधिकृत माहितीनुसार, या ज्युरीमध्ये एकूण पाच सदस्य आहेत. चित्रपट दिग्दर्शन, पटकथा लेखन, निर्मिती आणि ध्वनी रचना अशा विविध क्षेत्रांतील अनुभव असलेल्या या तज्ज्ञांकडे आंतरराष्ट्रीय स्पर्धेतील चित्रपटांचे परीक्षण करण्याची जबाबदारी असेल. जागतिक चित्रपटसृष्टीतील विविध शैली, कथनपद्धती आणि सांस्कृतिक दृष्टिकोन यांचा विचार करून उत्कृष्ट चित्रपटांची निवड करणे हे या ज्युरीसमोरील महत्त्वाचे काम असेल.
आनंद एल. राय यांच्याकडे अध्यक्षपदाची जबाबदारी
आनंद एल. राय हे हिंदी चित्रपटसृष्टीतील लोकप्रिय दिग्दर्शक आणि निर्माते आहेत. ‘तनु वेड्स मनु’, ‘तनु वेड्स मनु रिटर्न्स’, ‘रांझणा’ आणि ‘अतरंगी रे’ या चित्रपटांमधून त्यांनी मानवी नातेसंबंध, प्रेम, सामाजिक रूढी आणि भावनिक संघर्ष यांचे वेगळ्या पद्धतीने चित्रण केले आहे. ‘कलर यलो प्रॉडक्शन्स’ या निर्मिती संस्थेच्या माध्यमातून त्यांनी ‘तुम्बाड’, ‘न्यूटन’, ‘शुभ मंगल सावधान’, ‘हसीन दिलरुबा’ आणि ‘अॅक्शन हिरो’ यांसारख्या वेगळ्या विषयांवरील चित्रपटांनाही पाठबळ दिले आहे. मराठी चित्रपटसृष्टीतील ‘झिम्मा २’, ‘आत्मपॅम्फ्लेट’ आणि ‘फसक्लास दाभाडे’ यांसारख्या चित्रपटांशीही त्यांचा निर्मितीच्या माध्यमातून संबंध आहे.
कोलंबियाच्या मारिया अलेजांद्रा रोजास ध्वनी रचनेच्या क्षेत्रातील तज्ज्ञ
ज्युरीतील मारिया अलेजांद्रा रोजास या कोलंबियाच्या प्रसिद्ध ध्वनी रचनाकार आहेत. आंतरराष्ट्रीय चित्रपट, माहितीपट, प्रायोगिक चित्रपट आणि दूरचित्रवाणी क्षेत्रात त्यांनी काम केले आहे. बर्लिनाले, सनडान्स आणि रॉटरडॅम यांसारख्या प्रतिष्ठित चित्रपट महोत्सवांमध्ये गौरविल्या गेलेल्या चित्रपटांच्या ध्वनी रचनेत त्यांचे योगदान आहे. ‘द ब्ल्यू ट्रेल’, ‘द ट्युबा थीव्ह्ज’ आणि ‘फ्रिडा’ हे त्यांच्याशी संबंधित उल्लेखनीय चित्रपट आहेत.
थायलंडचे रत्चापूम बूनबुंचाचोके
थायलंडचे लेखक आणि दिग्दर्शक रत्चापूम बूनबुंचाचोके यांचाही ज्युरीमध्ये समावेश आहे. त्यांच्या ‘अ युजफुल घोस्ट’ या चित्रपटाला २०२५ मध्ये कान चित्रपट महोत्सवाच्या क्रिटिक्स वीक विभागात ग्रँड प्राइज मिळाले होते. त्यांचा ‘द बोव्हाइन कॉमेडी’ हा लघुपटही आंतरराष्ट्रीय स्तरावर चर्चेत राहिला आहे. प्रायोगिक आणि वेगळ्या कथनशैलीतील चित्रपटांसाठी ते ओळखले जातात.
