सिनेनामा 

‘शेर शिवराज’साठी चिन्मय मांडलेकरची कळकळीची विनंती

मुंबई :

दिग्दर्शक दिग्पाल लांजेकर (Digpal Lanjekar) यांच्या शिवराज अष्टकातील चौथा चित्रपट ‘शेर शिवराज’ (Sher Shivraj) हा 22 एप्रिल रोजी प्रदर्शित झाला. या चित्रपटाला मिळणारा प्रतिसाद पाहून आता त्याचे शोज वाढवण्यात येत आहेत. अभिनेता चिन्मय मांडलेकरने (Chinmay Mandlekar) यात छत्रपती शिवाजी महाराजांची भूमिका साकारली आहे. शिवचरित्रातील ‘अफझलखान वध’ हा शिवकालीन इतिहासाचा महत्त्वाचा अध्याय आहे. ज्यामुळं खऱ्या अर्थानं हिंदवी स्वराज्याची प्रतिष्ठापना झाली असं आपण म्हणू शकतो. आता हाच ऐतिहासिक सुवर्णअध्याय या चित्रपटातून दाखवण्यात आला आहे. मात्र हा चित्रपट थिएटरमध्ये पाहणाऱ्यांसाठी चिन्मयने कळकळीची विनंती केली आहे. चिन्मयने त्याच्या इन्स्टाग्राम अकाऊंटवर हा व्हिडीओ पोस्ट करत चाहत्यांना विनंती केली आहे.

काय म्हणाला चिन्मय मांडलेकर?

“तुम्ही या चित्रपटावर पहिल्या दिवसापासून, पहिल्या शोपासून जे भरभरून आणि तुडुंब प्रेम करताय ते आमच्यापर्यंत पोहोचतंच आहे. फक्त तुम्हा सर्वांना एक अत्यंत नम्र आणि कळकळीची विनंती करतो की चित्रपट पाहत असताना चित्रपटाचा शेवट मोबाईलवर शूट करून तो सोशल मीडियावर शेअर करू नका. आपले इतर मित्र जे हा चित्रपट नंतर बघणार आहेत, त्यांना तो थरार चित्रपटगृहात तसाच अनुभवू द्या, जसा तुम्ही अनुभवलात. माझी खात्री आहे की माझ्या या विनंतीला तुम्ही नक्की मान द्याल,” असं तो या व्हिडीओत म्हणाला.

अनेकांनी शेर शिवराजच्या क्लायमॅक्सचा व्हिडीओ शूट करून सोशल मीडियावर पोस्ट केला. मात्र क्लायमॅक्सचा सीन अशा पद्धतीने लीक होऊ नये म्हणून चिन्मयने ही विनंती केली आहे. चिन्मयच्या या व्हिडीओवर अनेकांनी प्रतिक्रिया व्यक्त केल्या आहेत. ‘सॉरी सर मी स्टोरीमध्ये शेवटचा सीन अपलोड केला होता. मला माझी चूक लक्षात आली आता स्टोरी डिलिट करतो,’ असं एकाने म्हटलं. तर अनेकांनी हा चित्रपट थिएटरमध्ये जाऊन पाहणार असल्याचं सांगितलंय. ज्यांनी हा चित्रपट पाहिला, त्यांनी चिन्मयच्या अभिनयाचं आणि चित्रपटाचं कौतुक केलं आहे.

Show More

Related Articles

Leave a Reply

Your email address will not be published.

Back to top button
Don`t copy text!
%d bloggers like this: