मुंबई : सुपरस्टार रजनीकांत (Rajanikanth) यांच्या बहुप्रतीक्षित ‘जेलर २’ (Jailer 2)या चित्रपटात अभिनेत्री विद्या बालनची एन्ट्री झाली आहे. चित्रपटाच्या निर्मात्यांनी विद्या बालनच्या (Vidya Balan) व्यक्तिरेखेची झलक नुकतीच प्रदर्शित केली असून, ती ‘कंथा’ या भूमिकेत दिसणार आहे. या व्यक्तिरेखेचा रजनीकांत यांच्या ‘टायगर’ मुथुवेल पांडियनशी सामना होणार असल्याचे या झलकवरून दिसते.
‘कंथा’च्या भूमिकेची झलक
चित्रपटाच्या निर्मात्यांनी प्रसिद्ध केलेल्या छोट्या व्हिडीओमध्ये विद्या बालन निळ्या साडीत आणि हातात सिगारेट घेऊन जिन्यावरून खाली येताना दिसते. तिच्या व्यक्तिरेखेत आत्मविश्वास आणि आक्रमकता असल्याचे या झलकमधून जाणवते. मात्र, ‘कंथा’च्या व्यक्तिरेखेचे नेमके स्वरूप अद्याप निर्मात्यांनी उघड केलेले नाही.
विद्या बालनच्या व्यक्तिरेखेबाबत यापूर्वी काही वृत्तांमध्ये ती मिथुन चक्रवर्ती यांच्या व्यक्तिरेखेच्या मुलीची भूमिका साकारणार असल्याचे म्हटले होते. मात्र, या माहितीस निर्मात्यांकडून अधिकृत दुजोरा मिळालेला नाही.
रजनीकांतसमोर नवे आव्हान
नेल्सन दिलीपकुमार दिग्दर्शित ‘जेलर २’ हा २०२३ मध्ये प्रदर्शित झालेल्या ‘जेलर’चा पुढील भाग आहे. रजनीकांत पुन्हा एकदा ‘टायगर’ मुथुवेल पांडियनच्या भूमिकेत दिसणार आहेत. राम्या कृष्णन, योगी बाबू, मिर्ना आणि रित्विक हे कलाकारही आपल्या आधीच्या व्यक्तिरेखांमध्ये परतणार आहेत.
चित्रपटात एस. जे. सूर्या, सुरज वेंजारामूडू, मिथुन चक्रवर्ती आणि विद्या बालन यांच्याही महत्त्वाच्या भूमिका आहेत. निर्मात्यांकडून टप्प्याटप्प्याने नव्या व्यक्तिरेखांची ओळख करून दिली जात आहे.
१५ ऑक्टोबरला प्रदर्शित होणार
‘जेलर २’चे लेखन आणि दिग्दर्शन नेल्सन दिलीपकुमार यांनी केले असून सन पिक्चर्सच्या बॅनरखाली कलानिधी मारन यांनी चित्रपटाची निर्मिती केली आहे. चित्रपट १५ ऑक्टोबर २०२६ रोजी चित्रपटगृहांत प्रदर्शित होणार आहे.
विद्या बालनसाठी हा विशेष प्रकल्प मानला जात आहे. ‘नेरकोंडा पारवाई’मध्ये छोट्या भूमिकेनंतर ‘जेलर २’मधून ती तमिळ चित्रपटात पूर्ण लांबीची भूमिका साकारणार आहे.
