sahitya academy : प्रकाश पर्येकरांच्या ‘वर्सल’ला साहित्य अकादमी

Sahitya Academy award : गोव्यातील प्रसिद्ध कोकणी साहित्यिक डॉ. प्रकाश पर्येकर यांच्या ‘वर्सल’ या पहिल्याच कथासंग्रहाला कोकणीतून, तर मराठीतील आघाडीचे साहित्यिक कृष्णात खोत यांच्या ‘रिंगाण’ या कादंबरीला बुधवारी साहित्य अकादमीचे पुरस्कार जाहीर झाले. या दोन्ही साहित्यिकांवर गोवा, महाराष्ट्रातून अभिनंदनाचा वर्षाव होत आहे.

साहित्य अकादमीने (Sahitya Academy award) दरवर्षीप्रमाणे यंदाही साहित्यातील मानाचे पुरस्कार जाहीर केले. विविध भाषांमधील ९ कवितासंग्रह, ६ कादंबऱ्या, ५ कथासंग्रह, ३ निबंध आणि एका टीकात्मक पुस्तकाला यंदा साहित्य अकादमी पुरस्कार जाहीर झालेला आहे. त्यात कोकणी भाषेत गोव्यातील कोकणी साहित्यिक डॉ. पर्येकर यांच्या ‘वर्सल’ कथासंग्रहाला, तर कोल्हापुरातील साहित्यिक प्रा. कृष्णात खोत यांच्या ‘रिंगाण’ या कादंबरीला हे पुरस्कार जाहीर झाले. १२ मार्च २०२४ रोजी नवी दिल्लीतील कमानी ऑडिटोरियममध्ये होणाऱ्या कार्यक्रमात हे पुरस्कार प्रदान केले जाणार आहेत.