विरोधक अराजक निर्माण करण्याचा प्रयत्न करत आहेत : नितीन नबीन

गोवा भाजपच्या राज्य कार्यकारिणीच्या बैठकीला संबोधित करताना नबीन म्हणाले की, राजकारणाचा अर्थ बदलण्याचा प्रयत्न काही नेत्यांकडून केला जात आहे. देश विकासाच्या दिशेने पुढे जात असताना विकास आणि सुशासनाच्या मुद्द्यांवर चर्चा करण्याऐवजी वातावरण बिघडवण्याचा प्रयत्न केला जात असल्याचा दावा त्यांनी केला.

‘राहुल गांधी विकासावर बोलताना ऐकले आहे का?’

राहुल गांधी यांच्यावर निशाणा साधताना नबीन यांनी, “लोकसभेतील विरोधी पक्षनेते विकासाबाबत बोलताना मी कधी ऐकलेले नाही. तुम्ही त्यांना विकासाच्या मुद्द्यावर बोलताना ऐकले असेल, तर सांगा,” असे म्हटले. विकासाच्या मुद्द्यावर प्रश्न उपस्थित झाल्यानंतर विरोधक चर्चेत सहभागी होण्याऐवजी अराजक निर्माण करण्याचा प्रयत्न करतात, असा आरोपही त्यांनी केला.

काँग्रेसच्या राज्य सरकारांवरही टीका

कर्नाटक आणि हिमाचल प्रदेशातील काँग्रेस सरकारांवरही नबीन यांनी टीका केली. निवडणुकीपूर्वी दिलेली आश्वासने या सरकारांनी पूर्ण केली नसल्याचा दावा त्यांनी केला. कर्नाटकात काँग्रेस सरकारला जवळपास तीन वर्षे झाली असूनही आश्वासनांची पूर्तता झालेली नाही, असे ते म्हणाले. हिमाचल प्रदेशातील काँग्रेस सरकारच्या कामगिरीबाबतही जनतेला विचारावे, असे नबीन यांनी नमूद केले.

याउलट मध्य प्रदेश, छत्तीसगड, राजस्थान आणि बिहार या राज्यांमध्ये भाजपची सरकारे जनतेला दिलेली आश्वासने पूर्ण करण्याच्या दिशेने काम करत असल्याचा दावा त्यांनी केला.

गोव्यात आगामी २०२७च्या विधानसभा निवडणुकीत भाजपला ५० टक्क्यांहून अधिक मते मिळतील, असा विश्वासही नितीन नबीन यांनी व्यक्त केला.