वाठार स्टेशन येथील नवीन बसस्थानक अवैध धंद्यांचे केंद्रबिंदू!

सातारा (महेश पवार) :
जिल्ह्यातील महत्त्वाची बाजारपेठ असलेल्या वाठार स्टेशन येथे गेली १५ वर्षांपासून बंद अवस्थेत असलेले नवीन बसस्थानक आता अवैध धंद्यांचे अड्डे बनल्याचे गंभीर चित्र समोर आले आहे. शासन आणि प्रशासनाच्या दुर्लक्षामुळे हे बसस्थानक मद्यपी, अनैतिक कृत्य करणारे आणि असामाजिक घटकांसाठी सुरक्षित ठिकाण ठरत आहे. बसस्थानकाच्या परिसरात मोठ्या प्रमाणावर घाणीचे साम्राज्य आहे. दारूच्या रिकाम्या बाटल्या, सिगारेटचे तुकडे, कंडोमची पाकिटे आणि महिलांच्या वस्त्रांचे अवशेष येथे सापडत असल्याने ग्रामस्थांमध्ये संतापाची लाट उसळली आहे.

स्वारगेटसारख्या प्रकारांची पुनरावृत्ती टाळण्यासाठी ग्रामस्थ आक्रमक

नुकत्याच पुण्यातील स्वारगेट बसस्थानकात घडलेल्या निंदनीय घटनेनंतर ग्रामस्थांनी वाठार स्टेशन बसस्थानकाबाबत सावध भूमिका घेतली आहे. शासनाच्या हलगर्जीपणामुळे जर येथे एखादा गंभीर अनुचित प्रकार घडला, तर त्याची संपूर्ण जबाबदारी प्रशासनावर राहील, असा इशारा ग्रामस्थांनी दिला आहे.

त्वरित बसस्थानक सुरू करण्याची मागणी, अन्यथा आंदोलन

ग्रामस्थांनी प्रशासनाला ठाम शब्दांत सांगितले आहे की, हे बसस्थानक त्वरित सुरू करण्यात यावे. अन्यथा मोठ्या प्रमाणावर आंदोलन छेडण्यात येईल. बसस्थानक बंद असल्यामुळे प्रवाशांची मोठी गैरसोय होत आहे, शिवाय अवैध धंद्यांना खतपाणी मिळत आहे. याबाबत शासनाने त्वरित लक्ष घालून बसस्थानक कार्यान्वित करावे आणि सुरक्षितता सुनिश्चित करावी, अशी ग्रामस्थांची ठाम मागणी आहे.

प्रशासनाकडून कोणती पावले उचलली जाणार?

या गंभीर परिस्थितीला जबाबदार कोण? प्रशासनाने याकडे का डोळेझाक केली? बसस्थानकाच्या सुरक्षेची जबाबदारी कोणाची? आणि सर्वसामान्य नागरिकांच्या सुरक्षिततेची हमी कोणी घेणार? असे अनेक प्रश्न ग्रामस्थ उपस्थित करत आहेत. प्रशासनाने त्वरित याकडे लक्ष देऊन कारवाई करावी, अन्यथा आंदोलनाशिवाय पर्याय उरणार नाही, असा ठाम इशारा ग्रामस्थांनी दिला आहे.

वाठार स्टेशन बसस्थानक कार्यान्वित होईपर्यंत ग्रामस्थांच्या या लढ्याला कोणता पाठिंबा मिळतो आणि प्रशासन यावर काय भूमिका घेते, हे पाहणे महत्त्वाचे ठरणार आहे.