शेतीला इव्हेंट दर्जा द्या : प्रभव नायक
मडगाव: मडगांवचो आवाज कळंगुटचो आवाज आणि शेती क्षेत्रातील युवा आयकॉन नरुशा डिसोजा यांच्या मागणीकडे पूर्ण सहमत आहे. आपल्या कष्टातून व बांधिलकीतून त्यांनी शेतीला नवी दिशा दिली असून, शासनाने शेतीला सर्वोच्च प्राधान्य द्यावे, अशी मागणी युवा नेते प्रभव नायक यांनी केली आहे.
प्रभव नायक यांनी गोवा सरकारकडे मागणी केली की शेतीला “राज्य इव्हेंट”चा दर्जा द्यावा व त्यासाठी जास्तीत जास्त निधी, धोरणात्मक पाठबळ आणि प्राधान्याने अंमलबजावणी करावी. “शेतकरी सुखी तर गोवा समृद्ध. शाश्वत विकासाची भाषा करणाऱ्या सरकारने शेतीकडे दुर्लक्ष करता कामा नये,” असे ते म्हणाले.
कळंगुटमधील एका तरुण महिला शेतकरीने पंचायतीकडे केलेल्या मोफत ट्रॅक्टर सुविधेच्या मागणीवर प्रतिक्रिया देताना प्रभव नायक म्हणाले की, ही मागणी शेतकऱ्यांच्या वास्तव अडचणी दाखवते. शेतकऱ्यांवर खर्चाचा बोजा टाकण्याऐवजी शासनाने यांत्रिकीकरण, साधनसामग्री व पायाभूत सुविधा मोफत किंवा अनुदानावर उपलब्ध करून द्यायला हव्यात.
“शेती ही सरकारच्या अजेंड्यावर सर्वोच्च प्राधान्याची बाब असली पाहिजे. आज अनेक युवक शेतीकडे वळण्यास तयार आहेत; मात्र धोरणात्मक पाठबळ, सुविधा आणि सन्मानाचा अभाव त्यांना परावृत्त करतो,” असे प्रभव नायक यांनी सांगितले. पंचायतींना सक्षम करून स्थानिक पातळीवर शेतकऱ्यांना मदत देणे गरजेचे असल्याचेही त्यांनी नमूद केले.
ते पुढे म्हणाले, “भाजप सरकार कोट्यवधी रुपये इव्हेंट्सवर खर्च करताना कधीही मागे-पुढे पाहत नाही. खर्चाला पोस्ट-फॅक्टो मंजुरी देणे आता नेहमीचेच झाले आहे. जर अल्पकालीन इव्हेंट्ससाठी एवढा निधी उपलब्ध होऊ शकतो, तर अन्नसुरक्षा व उपजीविकेसाठी महत्त्वाच्या शेतीसाठी का नाही?” असा सवाल त्यांनी उपस्थित केला.
प्रभव नायक म्हणाले, “माझी ठाम मागणी आहे की शेतीला ‘इव्हेंट दर्जा’ द्यावा. यामुळे निधी, आणि धोरणात्मक अंमलबजावणी सुनिश्चित होईल. सर्वात महत्त्वाचे म्हणजे, युवकांना शेतीकडे आकर्षित केले जाईल, शेतकऱ्यांचा सन्मान वाढेल आणि गोव्याचे भविष्य सुरक्षित होईल.”
