13 पासून राज्यात किंग मोमोची राजवट…
पणजी : गोवा सरकारच्या पर्यटन विभागाकडून बहुप्रतिक्षित गोवा कार्निव्हल २०२६ साजरा करण्याची जोरदार तयारी सुरू आहे. आनंद, रंग, संगीत आणि एकतेचे प्रतीक असलेला हा उत्सव गोव्याच्या समृद्ध सांस्कृतिक वारशाचे आणि उत्साही जीवनशैलीचे दर्शन घडवतो. स्थानिक नागरिकांसह देश-विदेशातील पर्यटक मोठ्या उत्साहाने या उत्सवात सहभागी होतात.
गोवा कार्निव्हल २०२६ची अधिकृत घोषणा जीटीडीसी चे व्यवस्थापकीय संचालक कुलदीप आरोलकर, पर्यटन उपसंचालक धीरज वागळे, सहाय्यक संचालक जयेश काणकोणकर, जीटीडीसीचे महाव्यवस्थापक गॅविन डायस, उपमहाव्यवस्थापक (हॉटेल्स व मार्केटिंग) दीपक नार्वेकर आणि किंग मोमो सेड्रिक दा कोस्टा यांच्या उपस्थितीत करण्यात आली. किंग मोमो यांनी कार्निव्हलचा उत्सवी माहोल प्रतीकात्मक पद्धतीने सुरू केला.
पर्यटन मंत्री रोहन ए. खंवटे म्हणाले, “गोवा कार्निव्हल हा आनंद, समावेशकता आणि सांस्कृतिक अभिमानाचा उत्सव आहे. विविध ठिकाणी हा उत्सव घेऊन आम्ही अधिकाधिक लोकांचा सहभाग सुनिश्चित करणार आहोत आणि पर्यटकांना अस्सल गोव्याचा अनुभव देणार आहोत. कार्निव्हल २०२६ आमच्या जबाबदार आणि पुनरुत्पादक पर्यटनाच्या दृष्टीकोनाचे प्रतिबिंब असेल.”
पर्यटन संचालक केदार नाईक यांनी सांगितले, “कार्निव्हल हा गोव्याच्या सांस्कृतिक ओळखीचा अत्यंत महत्त्वाचा भाग आहे. कार्निव्हल २०२६ अधिक व्यापक, सुरक्षित, स्वच्छ आणि दर्जेदार व्हावा यासाठी नियोजन करण्यात आले आहे.”
जीटीडीसी चे व्यवस्थापकीय संचालक कुलदीप आरोलकर यांनी सांगितले की, “ गोवा कार्निव्हल २०२६ साठी सुमारे ₹१.५३ कोटींचा खर्च करण्यात येणार आहे. यामध्ये ₹४८ लाख बक्षिसांसाठी आणि ₹१.०४ कोटी पायाभूत सुविधा व व्यवस्थापनासाठी आहेत. पर्वरीसाठी ₹१९ लाख, मोरजीसाठी ₹१६ लाख, तर पणजी, मडगाव, वास्को आणि म्हापसा येथे बक्षिसे व सुविधा यासाठी ₹२९.३५ लाखांची तरतूद करण्यात आली आहे. यामुळे सर्व ठिकाणी समान दर्जा, सुरक्षितता आणि चांगला अनुभव मिळेल.”
कार्निव्हलची सुरुवात १३ फेब्रुवारी २०२६ रोजी पर्वरी येथे पारंपरिक कर्टन रेजरने होईल.
१४ फेब्रुवारी रोजी पणजी येथे कार्निव्हल मिरवणुकीचा शुभारंभ होईल.
१५ फेब्रुवारी रोजी मडगाव,
१६ फेब्रुवारी रोजी वास्को,
आणि १७ फेब्रुवारी रोजी म्हापसा व मोरजी येथे उत्सवाचा समारोप होईल.
या वर्षीचा अधिकृत कार्निव्हल जिंगल २०२६ ‘RhythMix’ या बँडने सादर केला असून, त्याने उत्सवाचा जल्लोष वाढवला आहे. किंग मोमो यांनी दिलेला संदेश –
“आमचें गोंय, आमचे लोक, आमचो कार्निव्हल – Viva Goa, Viva Carnaval” हा यंदाच्या कार्निव्हलचा आत्मा दर्शवतो.
प्रत्येक ठिकाणी रंगीबेरंगी चित्ररथ, नृत्य, संगीत आणि आनंदी वातावरण पाहायला मिळेल. हा उत्सव गोव्याचे समुद्रकिनाऱ्यांपलीकडचे सांस्कृतिक सौंदर्य अधोरेखित करतो.
पर्यटन विभागाच्या दृष्टीकोनानुसार, कार्निव्हल २०२६ मध्ये स्वच्छता, सुरक्षितता, जबाबदारी आणि लोकसहभागावर विशेष भर देण्यात येणार आहे.
गोवा पर्यटन विभाग सर्व स्थानिक नागरिक, देशांतर्गत आणि आंतरराष्ट्रीय पर्यटकांना या भव्य उत्सवात सहभागी होण्याचे आवाहन करतो. मिरवणूक मार्ग, वेळा आणि इतर कार्यक्रमांची माहिती लवकरच जाहीर केली जाईल.
