गोवा मराठी चित्रपट महोत्सव ७ ते ९ ऑगस्टदरम्यान पणजीत
पणजी : गोव्यातील मराठी चित्रपटसृष्टीला व्यासपीठ उपलब्ध करून देणारा आणि रसिकांमध्ये विशेष लोकप्रिय असलेला गोवा मराठी चित्रपट महोत्सव यंदा ७ ते ९ ऑगस्ट या कालावधीत पणजी येथे आयोजित करण्यात येणार आहे. विन्सन वर्ल्डच्या पुढाकाराने आयोजित करण्यात येणारा हा महोत्सव राज्यातील तसेच महाराष्ट्रातील दर्जेदार मराठी चित्रपट, दिग्दर्शक, कलाकार आणि चित्रपटप्रेमींना एकत्र आणणारे महत्त्वाचे सांस्कृतिक व्यासपीठ मानले जाते.
महोत्सवात निवडक मराठी चित्रपटांचे प्रदर्शन, चित्रपटांवरील चर्चा, कलाकारांशी संवाद तसेच विविध सांस्कृतिक कार्यक्रमांचे आयोजन करण्यात येणार आहे. मराठी चित्रपटसृष्टीतील नवोदित आणि प्रस्थापित कलावंतांना आपल्या कलाकृती प्रेक्षकांपर्यंत पोहोचविण्याची संधी या महोत्सवातून मिळणार आहे.
गेल्या काही वर्षांत गोवा मराठी चित्रपट महोत्सवाने चित्रपटप्रेमींमध्ये स्वतंत्र ओळख निर्माण केली असून दरवर्षी या महोत्सवाची उत्सुकतेने प्रतीक्षा केली जाते. यंदाच्या महोत्सवातही विविध आशयघन आणि दर्जेदार चित्रपटांचा आस्वाद रसिकांना घेता येणार असल्याने चित्रपटवर्तुळात उत्साहाचे वातावरण आहे.
महोत्सवाच्या सविस्तर कार्यक्रमाची घोषणा लवकरच करण्यात येणार असल्याची माहिती आयोजकांनी दिली आहे.
