मारियानो रॉड्रिग्ज यांचा हजारो समर्थकांसह काँग्रेसमध्ये प्रवेश
पणजी : आगामी विधानसभा निवडणुकांच्या पार्श्वभूमीवर गोव्यातील राजकीय घडामोडींना वेग आला असून, सामाजिक कार्यकर्ते मारियानो रॉड्रिग्ज यांनी मंगळवारी काँग्रेस पक्षात प्रवेश केला. कॉर्टाळीम येथील डॉ. इसिडोरो कार्व्हालो बहुउद्देशीय सभागृहात झालेल्या कार्यक्रमात हजारो समर्थकांसह त्यांनी काँग्रेसचे सदस्यत्व स्वीकारले.
गोवा प्रदेश काँग्रेस समितीचे अध्यक्ष गिरीश चोडणकर यांनी रॉड्रिग्ज यांचा सदस्यत्व अर्ज स्वीकारून त्यांचे पक्षात स्वागत केले. विरोधी पक्षनेते युरी आलेमाव, अखिल भारतीय काँग्रेस समितीचे गोवा प्रभारी माणिकराव ठाकरे यांनी त्यांना काँग्रेसचा ध्वज सुपूर्द केला. यावेळी एआयसीसीच्या सहप्रभारी डॉ. अंजली निंबाळकर, जीपीसीसीचे कार्याध्यक्ष एम. के. शेख, जिल्हाध्यक्ष असिज नोरोन्हा, ब्लॉक काँग्रेस अध्यक्ष पीटर डिसोझा, महिला काँग्रेसच्या अध्यक्षा प्रतीक्षा खलप, युवक काँग्रेसचे अध्यक्ष अर्चित नाईक, जीपीसीसीचे प्रवक्ते ॲड. अमित पालेकर, अल्पसंख्याक विभागाचे अध्यक्ष नझीर खान यांच्यासह पक्षाचे पदाधिकारी व कार्यकर्ते उपस्थित होते.
मारियानो रॉड्रिग्ज यांच्यासोबत मोठ्या संख्येने समर्थकांनी काँग्रेसमध्ये प्रवेश केल्याने हा कार्यक्रम पक्षाच्या शक्तिप्रदर्शनाचा ठरल्याचा दावा काँग्रेसने केला. या प्रवेशामुळे दक्षिण गोव्यातील पक्ष संघटना अधिक बळकट होईल, असा विश्वास काँग्रेस नेत्यांनी व्यक्त केला.
यावेळी बोलताना काँग्रेस नेत्यांनी राज्यातील बेरोजगारी, महागाई, भ्रष्टाचार, प्रशासनातील त्रुटी तसेच गोव्याची ओळख आणि पर्यावरणाच्या संरक्षणाबाबत राज्य सरकारवर टीका केली. आगामी निवडणुकीत जनतेने काँग्रेसच्या पाठीशी उभे राहून राज्यात पारदर्शक व लोकाभिमुख प्रशासनासाठी साथ द्यावी, असे आवाहन त्यांनी केले.
कार्यक्रमाच्या अखेरीस कार्यकर्त्यांनी आगामी निवडणुकांमध्ये काँग्रेसचा विजय सुनिश्चित करण्यासाठी संघटनात्मक पातळीवर अधिक जोमाने काम करण्याचा निर्धार व्यक्त केला.
