काँग्रेसचा संघटनात्मक ढासळलेपणा उघड : विशाल पै काकोडे
मडगाव : २० ऑगस्ट २०२६ रोजी गोवा काँग्रेसच्या राजकीय व्यवहार समितीची पुनर्रचना करण्यात आल्याने आपण वारंवार उपस्थित केलेल्या गंभीर संघटनात्मक प्रश्नांवर शिक्कामोर्तब झाले आहे, असे राजकीय विश्लेषक आणि काँग्रेस विचारसरणीचे समर्थक विशाल पै काकोडे यांनी म्हटले आहे.
राजकीय व्यवहार समिती कालबाह्य झाल्याचे निदर्शनास आणून देत काँग्रेसचे सरचिटणीस (संघटन) के. सी. वेणुगोपाल यांच्या गोवा भेटीदरम्यान ३ जुलै रोजी आपण त्यांना पत्र लिहिले होते; मात्र त्यानंतर कोणतीही सुधारात्मक कारवाई झाली नाही. त्यानंतर १६ ऑगस्ट रोजी काँग्रेस अध्यक्ष मल्लिकार्जुन खरगे यांना पत्र लिहिल्यानंतर, त्यांच्या गोवा भेटीच्या अवघ्या ४८ तासांत अखेर समितीची पुनर्रचना करण्यात आली, असे पै काकोडे यांनी सांगितले.
“माझी भूमिका योग्य असल्याचे सिद्ध झाले आहे. काँग्रेसचे संघटन सरचिटणीस आणि काँग्रेस अध्यक्ष या दोघांनीही कालबाह्य राजकीय व्यवहार समितीच्या बैठकांना उपस्थिती लावली. गोवा काँग्रेसच्या नेतृत्वाला आपल्या वरिष्ठ नेत्यांचे दूरध्वनी क्रमांक लक्षात राहत नाहीत, चुकीच्या क्रमांकांवर संदेश पाठवले जातात आणि राजकीय व्यवहार समितीच्या बैठकीसाठी कार्यकारी अध्यक्षालाही निमंत्रित केले जात नाही,” असे पै काकोडे यांनी म्हटले.
“पुनर्रचित समितीच्या सदस्यांच्या यादीवर नजर टाकल्यास किमान चार सदस्य गंभीर आजारांनी त्रस्त आहेत, तर काहींची राजकीय मुळे महाराष्ट्रवादी गोमंतक पक्षात आहेत. वैयक्तिक लाभ आणि अन्य अंतस्थ हेतूंसाठी बाह्य राजकीय संबंध कायम ठेवण्याचा छुपा अजेंडा असल्याचेही या समितीच्या रचनेतून उघड होते,” असा आरोप त्यांनी केला.
“अधिकृत सोशल मीडिया समूह का तयार करण्यात आलेले नाहीत, ज्यांवर एकच संदेश पोस्ट करून सर्व संबंधितांपर्यंत पोहोचवता येईल? नेतृत्वाला स्वतःच्या संघटनेतच संवाद आणि समन्वय साधता येत नसेल, तर ते आघाडीतील मित्रपक्ष आणि नागरिकांशी कसे जोडलेले राहणार?” असा सवाल विशाल पै काकोडे यांनी उपस्थित केला. हा संपूर्ण प्रकार काँग्रेसचा वरपासून खालपर्यंतचा संघटनात्मक ढासळलेपणा उघड करतो, असेही त्यांनी म्हटले.
