सत्यवान तळवाडकर काँग्रेसमध्ये; पदोन्नती, एसटी आरक्षणावर चोडणकरांचे सवाल
पणजी : सत्यवान तळवाडकर यांनी सोमवारी काँग्रेसमध्ये प्रवेश केला. अखिल भारतीय काँग्रेस समितीचे गोवा प्रभारी माणिकराव ठाकरे, गोवा सहप्रभारी डॉ. अंजली निंबाळकर आणि गोवा प्रदेश काँग्रेस समितीचे कार्याध्यक्ष एम. के. शेख यांच्या उपस्थितीत हा प्रवेश झाला.
यावेळी जीपीसीसीचे सरचिटणीस प्रदीप नाईक, माध्यम व संवाद विभागाचे अध्यक्ष अमरनाथ पणजीकर, जिल्हाध्यक्ष राजेश वेरेकर, सांगे ब्लॉक काँग्रेस अध्यक्ष डियागो फर्नांडिस, काँग्रेसचे ज्येष्ठ नेते राजनिकांत नाईक, चांदा वेळीप आणि सत्यवान गावकर उपस्थित होते.
तळवाडकर यांच्या काँग्रेस प्रवेशाचे स्वागत करताना जीपीसीसी अध्यक्ष गिरीश चोडणकर यांनी त्यांच्या पदोन्नतीच्या प्रश्नासह अनुसूचित जमातींचे (एसटी) हक्क, सामाजिक न्याय आणि समान संधीच्या मुद्द्यांवर प्रश्न उपस्थित केले.
लेखा संचालनालयातील पदोन्नतीच्या प्रकरणात तळवाडकर यांच्यावर अन्याय झाला का, याची वस्तुनिष्ठ आणि पारदर्शक चौकशी होण्याची गरज आहे, असे चोडणकर यांनी म्हटले. पदोन्नतीच्या प्रश्नावर तळवाडकर यांना न्यायालयात धाव घ्यावी लागल्याचा दावा त्यांनी केला. या प्रकरणात जातीय विचारांचा प्रभाव पडला असण्याची शक्यता असल्याचा आरोपही चोडणकर यांनी केला.
“आपल्या हक्कासाठी तळवाडकर यांना न्यायालयात जावे लागले. सरकारी सेवेत समान आणि निष्पक्ष वागणुकीबाबत त्यांच्या प्रकरणातून प्रश्न निर्माण झाले असून, या बाबींची पारदर्शकपणे तपासणी झाली पाहिजे,” असे चोडणकर म्हणाले.
एसटी निधीच्या वापराबाबतही सवाल
एसटी समाजासाठी राखीव निधीच्या विनियोगाबाबतही चोडणकर यांनी सरकारकडे स्पष्टीकरण मागितले. ३,२०० कोटी रुपयांच्या निधीची तरतूद आणि प्रत्यक्ष वापर याबाबत सरकारने स्पष्टता द्यावी, अशी मागणी त्यांनी केली.
एसटी आरक्षणाचा प्रश्न अद्याप अनिश्चित असल्याचा दावा करत हा विषय विशेषतः तरुणांसाठी चिंतेचा असल्याचे चोडणकर यांनी सांगितले.
“एसटी समाजातील तरुण आरक्षण, रोजगाराच्या संधी आणि त्यांच्या भवितव्याबाबत स्पष्ट उत्तरे मागत आहेत. सरकारकडून पारदर्शकता आणि उत्तरदायित्वाची मागणी करण्याचा त्यांना अधिकार आहे,” असे ते म्हणाले.
माजी मंत्री गोविंद गावडे यांच्या मंत्रिपदावरून झालेल्या हकालपट्टीच्या पार्श्वभूमीवरही प्रश्न उपस्थित झाले होते, तसेच एसटी आरक्षणाचा मुद्दाही चर्चेत आला होता, असे चोडणकर यांनी नमूद केले.
‘सामाजिक न्यायासाठी काँग्रेसची भूमिका’
एआयसीसीचे गोवा प्रभारी माणिकराव ठाकरे यांनी तळवाडकर यांचे काँग्रेसमध्ये स्वागत करताना समानता, प्रतिष्ठा आणि सामाजिक न्यायाच्या संरक्षणासाठी पक्ष कटिबद्ध असल्याचे सांगितले.
“प्रत्येक नागरिकाला समान वागणूक आणि न्याय्य संधी मिळण्याचा अधिकार आहे. अशा अधिकारांपासून वंचित राहिल्याच्या तक्रारी असतील तर त्या घटनात्मक आणि कायदेशीर मार्गाने ऐकून घेतल्या पाहिजेत,” असे ठाकरे म्हणाले.
एआयसीसीच्या गोवा सहप्रभारी डॉ. अंजली निंबाळकर यांनीही रोजगार, आरक्षण आणि कल्याणकारी योजनांशी संबंधित प्रश्न पारदर्शकपणे हाताळण्याची गरज व्यक्त केली. नागरिकांच्या प्रश्नांवर संवाद, उत्तरदायित्व आणि योग्य कार्यवाही होणे अपेक्षित असल्याचे त्यांनी सांगितले.
दरम्यान, काँग्रेसमध्ये प्रवेश केल्यानंतर तळवाडकर यांनी पक्षाच्या नेतृत्वाचे आभार मानले. तसेच जनतेच्या प्रश्नांसाठी काम करण्याची भूमिका त्यांनी व्यक्त केली.
