इफ्फीसाठी गोवेकरांना यंदा डे पास; मुख्यमंत्री प्रमोद सावंत यांची घोषणा
पणजी : गोव्यात आयोजित होणाऱ्या ५७व्या आंतरराष्ट्रीय भारतीय चित्रपट महोत्सवात (इफ्फी) यंदा स्थानिक गोमंतकीय नागरिकांना डे पासच्या माध्यमातून सहभागी होता येणार आहे. गोवेकरांना महोत्सवातील चित्रपट पाहता यावेत, यासाठी ही सुविधा उपलब्ध करून देण्यात येणार असल्याची घोषणा मुख्यमंत्री प्रमोद सावंत यांनी केली.
मनोरंजन संस्थेच्या गोवा (ईएसजी) संचालक मंडळाच्या बैठकीनंतर मुख्यमंत्री सावंत यांनी ही माहिती दिली. यंदाचा इफ्फी महोत्सव २० ते २८ नोव्हेंबरदरम्यान गोव्यात होणार आहे. महोत्सवाचा पूर्वारंभ कार्यक्रम १२ नोव्हेंबर रोजी आयोजित करण्यात येणार आहे.
दरम्यान, गोव्यातील चित्रपट निर्मात्यांसाठी बंद पडलेली चित्रपट अर्थसाहाय्य योजना पुन्हा सुरू करण्यात येणार असल्याचे मुख्यमंत्र्यांनी सांगितले. या योजनेंतर्गत प्रलंबित असलेली अनुदानाची रक्कम इफ्फी सुरू होण्यापूर्वी वितरित करण्यात येईल, असे आश्वासनही त्यांनी दिले.
यंदाच्या इफ्फीमध्ये गोमंतकीय दिग्दर्शक आदित्य जांभळे यांच्यासह अन्य स्थानिक दिग्दर्शकांचा त्यांच्या चित्रपट क्षेत्रातील योगदानाबद्दल गौरव करण्यात येणार आहे. राष्ट्रीय चित्रपट पुरस्कारप्राप्त दिग्दर्शक आदित्य जांभळे यांचा या गौरव सोहळ्यात समावेश असेल.
महोत्सवासाठी यंदा किती चित्रपटगृहांचा समावेश केला जाणार, याबाबत अद्याप अंतिम निर्णय झालेला नाही. गेल्या वर्षी महोत्सवाचा विस्तार करत फोंडा आणि मडगावसह विविध ठिकाणी अतिरिक्त चित्रपटगृहांमध्ये चित्रपट प्रदर्शन आयोजित करण्यात आले होते. यंदाही महोत्सवाचा विस्तार करण्याच्या दृष्टीने नियोजन सुरू आहे.
गोवेकरांसाठी उपलब्ध होणाऱ्या डे पासचे वितरण, त्यासाठीची नोंदणी प्रक्रिया आणि प्रवेशाच्या अटी याबाबतची सविस्तर माहिती अद्याप जाहीर करण्यात आलेली नाही.
