‘आधी शिवसेना, मग राष्ट्रवादी, आता तृणमूल…’; राहुल गांधींचा निवडणूक आयोगावर निशाणा
नवी दिल्ली : तृणमूल काँग्रेसच्या पक्षनाव आणि निवडणूक चिन्हाबाबत निवडणूक आयोगाने घेतलेल्या अंतरिम निर्णयाच्या पार्श्वभूमीवर काँग्रेस नेते आणि लोकसभेतील विरोधी पक्षनेते राहुल गांधी यांनी आयोग तसेच भाजपवर जोरदार टीका केली आहे. शिवसेना आणि राष्ट्रवादी काँग्रेसमधील पक्षफुटीनंतर आता तृणमूल काँग्रेसच्या बाबतीतही त्याच प्रकारची परिस्थिती निर्माण करण्यात येत असल्याचा आरोप त्यांनी केला.
राहुल गांधी यांनी शुक्रवारी ‘एक्स’वर पोस्ट करत या प्रकरणावर आपली भूमिका मांडली. “आधी शिवसेना, मग राष्ट्रवादी काँग्रेस आणि आता तृणमूल काँग्रेस. प्रत्येक वेळी एकच पद्धत दिसून येते, भाजप आणि निवडणूक आयोग मिळून पक्ष फोडतात आणि त्यानंतर पक्षाचे निवडणूक चिन्ह काढून घेतले जाते,” असा आरोप त्यांनी केला.
तृणमूलचे पक्षनाव, चिन्ह वापरण्यास मनाई
पश्चिम बंगालमधील तृणमूल काँग्रेसमध्ये दोन गट निर्माण झाल्याचा दावा दोन्ही बाजूंनी करण्यात आल्यानंतर निवडणूक आयोगाने गुरुवारी अंतरिम आदेश जारी केला. त्यानुसार दोन्ही गटांना सध्या ‘ऑल इंडिया तृणमूल काँग्रेस’ हे पक्षनाव आणि ‘फुले व गवत’ हे राखीव निवडणूक चिन्ह वापरता येणार नाही. आगामी विधानसभा पोटनिवडणुका लक्षात घेऊन दोन्ही गटांना स्वतंत्र नाव आणि मुक्त चिन्ह निवडण्याचे निर्देश देण्यात आले आहेत.
निवडणूक आयोगाच्या म्हणण्यानुसार, तृणमूल काँग्रेसमध्ये दोन प्रतिस्पर्धी गट असल्याचे उपलब्ध कागदपत्रे आणि दाव्यांवरून दिसून येते. दोन्ही गटांकडून आपणच पक्षाचे प्रतिनिधित्व करत असल्याचा दावा करण्यात आल्याने पक्षाचे नाव आणि चिन्ह कोणत्या गटाला द्यायचे, याबाबत सविस्तर निर्णय घेणे आवश्यक आहे. हा निर्णय निवडणूक चिन्ह आदेशातील परिच्छेद १५ अंतर्गत घेतला जाणार आहे.
‘पक्षच चोरीला जाऊ शकतो तर मतांची चोरी…’
निवडणूक आयोगाच्या निर्णयावर टीका करताना राहुल गांधी यांनी आपल्या यापूर्वीच्या ‘मतचोरी’च्या आरोपांशीही या प्रकरणाची सांगड घातली.
“एखादा संपूर्ण पक्षच चोरीला जाऊ शकतो, तर कोट्यवधी भारतीयांच्या मतांची चोरी होणे आश्चर्यकारक नाही,” असे ते म्हणाले. ‘मतांची चोरी, सरकारची चोरी आणि आता पक्षाची चोरी’ ही लोकशाहीच्या अधोगतीची चिन्हे असल्याचा दावा त्यांनी केला.
‘निवडणूक आयोगाची जबाबदारी जनादेशाचे रक्षण करण्याची’
निवडणूक आयोगाची घटनात्मक जबाबदारी जनतेच्या जनादेशाचे संरक्षण करण्याची आहे. मात्र, जनतेचा कौल बदलण्याचा प्रयत्न करणाऱ्या शक्तींना आयोग मदत करत असल्याचा आरोप राहुल गांधी यांनी केला.
“ही केवळ ममता बॅनर्जी यांची लढाई नाही. स्वतंत्र आणि निष्पक्ष निवडणुका इच्छिणाऱ्या प्रत्येक राजकीय पक्षाची आणि प्रत्येक मतदाराची ही लढाई आहे,” असे राहुल गांधी यांनी म्हटले आहे.
दरम्यान, तृणमूल काँग्रेसच्या दोन्ही गटांमधील वादावर निवडणूक आयोगाकडून अंतिम निर्णय अद्याप झालेला नाही. आगामी पोटनिवडणुकांच्या पार्श्वभूमीवर दोन्ही गटांना तात्पुरत्या स्वरूपात स्वतंत्र नाव आणि चिन्ह घेऊन निवडणूक लढवावी लागणार आहे.
