‘या’ शाळेत शिकवले जात आहेत द्वेषाचे धडे…

या व्हिडीओत आरोपी शिक्षिका वर्गातील विद्यार्थ्यांमध्ये मुस्लीम विद्यार्थ्यांविषयी द्वेष निर्माण करताना दिसत आहे. तसेच मुस्लीम धर्मावर वादग्रस्त वक्तव्य केल्याचंही समोर आलं आहे. अधिकाऱ्यांनी दिलेल्या माहितीनुसार, हा संतापजनक प्रकार गुरुवारी (२४ ऑगस्ट) मनसुरपूर पोलीस स्टेशन अंतर्गत येणाऱ्या खुब्बारपूर गावातील शाळेत घडला.

आरोपी शिक्षिकेचं नाव त्रिप्ता त्यागी असं आहे. पोलीस प्रशासन आणि शिक्षण विभाग आरोपी शिक्षिका आणि तिच्या मालकीच्या नेहा पब्लिक स्कुल या शाळेविरोधात कारवाईबाबत चाचपणी करत आहे.

आरोपी शिक्षिकेने मुस्लीम विद्यार्थ्याला सर्वांसमोर उभं केलं. यानंतर वर्गातील सर्व विद्यार्थ्यांना समोर येऊन या विद्यार्थ्याला मारण्यास सांगितले. तसेच मी तर आता जाहीर केलं आहे की, या मुस्लीम मुलांनी कुणाच्याही भागात जावं. शिक्षिकेच्या आदेशानंतर वर्गातील एका मुलाने पीडित मुस्लीम मुलगा रडत असतानाही त्याच्या तोंडावर चापट मारली. यानंतर शिक्षिका त्या मुलाला म्हणाली की, तू असं काय मारतो आहेस, जोरात मार. यानंतर आणखी दोन मुलं उठली आणि त्यांनीही पीडित मुलाला मारहाण केली.

यानंतर शिक्षिका म्हणाली की, चला मारण्याचं आणखी कोण बाकी आहे. आता पाठिवर मारा. तोंडावर मारल्याने त्याचं लाल होत आहे. त्यामुळे तोंडावर मारू नका. सर्वांनी पाठिवर मारा.