गोवा
आषाढीनिमित्त फोंड्यात रंगला ‘विठ्ठला पांडुरंगा’
राजेश्री क्रिएशन्स आणि कला व संस्कृती संचालनालय यांच्या संयुक्त विद्यमाने आषाढी एकादशीनिमित्त पांडुरंग विठ्ठल या भक्तिपर संगीत कार्यक्रमाचे आयोजन राजीव गांधी कला मंदिर, फोंडा येथे करण्यात आले. कार्यक्रमात मराठी चित्रपटसृष्टीतील प्रसिद्ध गायिका मानसी केळकर आणि दूरदर्शन कलाकार हेमंत बर्वे यांच्या मनमोहक सादरीकरणांनी रसिक मंत्रमुग्ध झाले. त्यांच्या समवेत गोव्यातील सुप्रसिद्ध गायक गायिकांनीही आपली सुरेल प्रस्तुती दिली.
गोव्यातील आघाडीच्या संगीतकारांच्या साथसंगतीने सादर झालेल्या या भक्तिपर कार्यक्रमात विठ्ठलभक्तीला सांस्कृतिक आणि आध्यात्मिक साद घालण्यात आली. यावेळी कार्यक्रमाला प्रमुख पाहुण्या म्हणून रिना गोविंद गावडे, विश्वनाथ (अपूर्व) दळवी यांनी उपस्थिती लावली होती, तसेच अन्य मान्यवरांचाही गौरवपूर्ण सहभाग लाभला. कार्यक्रमास श्रोत्यांचा उत्स्फूर्त प्रतिसाद मिळाला आणि आषाढी एकादशीचा पवित्र उत्सव भावपूर्ण भक्तीगीतांनी साजरा करण्यात आला.
