भारतीय गोल्फला एअर इंडियाचे पाठबळ
गुरुग्राम :
एअर इंडियाच्या पुरस्कारप्राप्त ‘महाराजा क्लब’ या फ्रिक्वेंट फ्लायर कार्यक्रमाने देशातील व्यावसायिक गोल्फच्या विकासाला चालना देण्यासाठी प्रोफेशनल गोल्फ टूर ऑफ इंडिया (पीजीटीआय) सोबत भागीदारी जाहीर केली आहे. या करारानुसार ऑगस्ट २०२६ ते एप्रिल २०२७ या कालावधीत देशभर होणाऱ्या डीपी वर्ल्ड पीजीटीआय स्पर्धांसाठी महाराजा क्लब अधिकृत प्रवास भागीदार म्हणून काम पाहणार आहे.
या भागीदारीद्वारे स्पर्धांमध्ये सहभागी होणाऱ्या खेळाडू, अधिकारी आणि संबंधित प्रतिनिधींना अखंड व सुलभ प्रवास सुविधा उपलब्ध करून देण्यात येणार असून, त्यामुळे त्यांना स्पर्धेतील कामगिरीवर अधिक लक्ष केंद्रित करता येणार आहे.
महाराजा क्लबच्या सदस्यांसाठीही या सहकार्याअंतर्गत निवडक स्पर्धांमध्ये विशेष प्रवेश, आतिथ्य सुविधा आणि विविध सहभाग उपक्रमांचा लाभ उपलब्ध होणार आहे. यामुळे सदस्यांना व्यावसायिक गोल्फशी अधिक जवळून जोडले जाण्याची संधी मिळणार असून, महाराजा क्लबची प्रवासाबरोबरच जीवनशैलीविषयक अनुभव देणारा कार्यक्रम म्हणून ओळख अधिक दृढ होणार आहे.
या भागीदारीबाबत डीपी वर्ल्ड पीजीटीआयचे अध्यक्ष कपिल देव यांनी समाधान व्यक्त केले. एअर इंडिया महाराजा क्लबसारखा विश्वासार्ह आणि प्रतिष्ठित ब्रँड अधिकृत प्रवास भागीदार म्हणून जोडला गेल्याने भारतीय व्यावसायिक गोल्फच्या विस्ताराला नवी गती मिळेल, तसेच खेळाडू आणि अधिकाऱ्यांना दर्जेदार प्रवासाचा अनुभव मिळेल, असे त्यांनी सांगितले.
एअर इंडियाचे मुख्य व्यावसायिक अधिकारी निपुण अगरवाल यांनी सांगितले की, क्रीडा क्षेत्रातील उत्कृष्टतेला पाठबळ देण्याच्या एअर इंडियाच्या प्रयत्नांचा हा महत्त्वाचा भाग आहे. या भागीदारीमुळे देशभरातील स्पर्धांमध्ये सहभागी होणाऱ्या खेळाडूंना आवश्यक प्रवास सुविधा उपलब्ध करून देण्याबरोबरच महाराजा क्लबच्या सदस्यांसाठीही आगळेवेगळे अनुभव निर्माण करण्यात येतील.
संपूर्ण स्पर्धा हंगामात चाहत्यांच्या सहभागासाठी विविध विशेष उपक्रम राबविण्यात येणार असून, एअर इंडियाच्या व्यापक देशांतर्गत आणि आंतरराष्ट्रीय नेटवर्कच्या माध्यमातून भारतीय गोल्फला जागतिक स्तरावर अधिक व्यापक ओळख मिळवून देण्याचाही प्रयत्न या भागीदारीतून केला जाणार आहे.
