दत्ता नायक यांच्या लेखासंदर्भात काँग्रेसने भूमिका स्पष्ट करावी : विशाल पै काकोडे
मडगाव :
गोवा प्रदेश काँग्रेस समितीचे खजिनदार दत्ता दामोदर नायक यांनी लिहिलेल्या वादग्रस्त लेखाबाबत काँग्रेसने तातडीने आपली भूमिका स्पष्ट करावी, अशी मागणी राजकीय विश्लेषक आणि काँग्रेसनिष्ठ विशाल पै काकोडे यांनी केली आहे. कोंकणी भाषा मंडळ, अखिल भारतीय कोंकणी परिषद तसेच ज्येष्ठ साहित्यिक ॲड. उदय भेंब्रे यांनी या लेखाचा निषेध केला असून, शणै गोंयबाब यांचा अवमान झाल्याचा आरोप केला आहे.
काकोडे यांनी प्रसिद्धीपत्रकाद्वारे म्हटले आहे की, संबंधित लेखात एका विशिष्ट समाजाचा जातीय संदर्भ देत अवमानकारक शब्दप्रयोग करण्यात आले असून त्यामुळे त्या समाजाच्या भावना दुखावल्या आहेत. दत्ता नायक यांनी संपूर्ण लेखात शणै गोंयबाब आणि इतरांचा उल्लेख करताना ‘बामण’ आणि ‘बामणी’ हे शब्द वारंवार उपहासात्मक स्वरूपात वापरल्याचा आरोप त्यांनी केला.
जातीय ओळखीच्या आधारे कोणत्याही समाजाला लक्ष्य करणे किंवा सार्वजनिक चर्चेत अवमानकारक भाषेचा वापर करणे योग्य नसल्याचे काकोडे यांनी नमूद केले. त्यांनी म्हटले की, ही बाब केवळ वैचारिक मतभेद किंवा टीकेच्या चौकटीत न राहता सामाजिक सलोख्यावर परिणाम करणारी आहे.
दत्ता नायक यांनी यापूर्वीही मंदिरे आणि मठ यांना ‘लुटारू’ असे संबोधून धार्मिक आणि सांस्कृतिक संस्थांबाबत आदर बाळगणाऱ्या अनेकांच्या भावना दुखावल्याचा आरोप काकोडे यांनी केला. श्रद्धा, परंपरा आणि विशिष्ट समाजघटकांना सातत्याने टीकेचे किंवा उपहासाचे लक्ष्य करण्याची प्रवृत्ती या लेखनातून दिसून येत असल्याचे त्यांनी म्हटले.
विशाल पै काकोडे म्हणाले की, प्रत्येक नागरिकाला स्वतःची वैयक्तिक श्रद्धा किंवा नास्तिक विचार बाळगण्याचा घटनात्मक अधिकार आहे. मात्र, देव, स्वामी, धार्मिक संस्था आणि प्राचीन परंपरांवर श्रद्धा ठेवणाऱ्यांचा अपमान करण्याचा अधिकार कोणालाही नाही. त्याचप्रमाणे, अभिव्यक्ती स्वातंत्र्याच्या नावाखाली जातीय अवमानकारक शब्दप्रयोग करण्याचा किंवा एखाद्या समाजाला कमी लेखण्याचा अधिकारही कोणालाही नाही. राजकीय पक्षांचे पदाधिकारी आणि सार्वजनिक जीवनातील व्यक्तींवर सामाजिक सलोखा आणि परस्पर आदर जपण्याची अधिक जबाबदारी असते.
