गुंतवणुकीच्या दाव्यांवर DMKचा सवाल; विजय यांच्या लंडन दौऱ्यावरही टीका
चेन्नई : तामिळनाडूमध्ये सत्तेवर असलेल्या तामिळगा वेत्री कळघम (TVK) सरकारने पहिल्या १०० दिवसांत एक लाख कोटी रुपयांहून अधिक गुंतवणूक आकर्षित केल्याच्या दाव्यावर विरोधी द्रमुकने (DMK) प्रश्नचिन्ह उपस्थित केले आहे. मुख्यमंत्री सी. जोसेफ विजय यांच्या लंडन दौऱ्याच्या उद्देशावरही DMKने टीका केली आहे.
DMKच्या मुखपत्र ‘मुरासोली’मधील संपादकीयातून राज्यातील गुंतवणुकीच्या स्थितीवर सरकारला लक्ष्य करण्यात आले. २०२६च्या पहिल्या तिमाहीत तामिळनाडूमध्ये नव्या गुंतवणुकीच्या प्रस्तावांमध्ये ७४.५ टक्क्यांची घट झाल्याचा दावा DMKने केला आहे. तसेच गुंतवणूक आकर्षित करण्याच्या बाबतीत राज्याची क्रमवारी सहाव्या स्थानावरून १७व्या स्थानावर घसरल्याचा आरोपही करण्यात आला आहे.
आंध्र प्रदेश, कर्नाटक आणि तेलंगणाकडे औद्योगिक गुंतवणूक वळत असल्याचा दावा DMKने केला. चेन्नईजवळील परंदूर येथे प्रस्तावित ग्रीनफिल्ड विमानतळ प्रकल्प रद्द करण्याच्या सरकारच्या निर्णयावरही पक्षाने टीका केली. विधानसभा निवडणुकीपूर्वी या प्रकल्पाला TVKने शेतकरी, कृषी जमीन आणि जलस्रोतांच्या मुद्द्यावरून विरोध केला होता.
‘एक लाख कोटींची गुंतवणूक नेमकी कुठे?’
TVK सरकारने पहिल्या १०० दिवसांत एक लाख कोटी रुपयांहून अधिक गुंतवणूक मिळवल्याचा दावा केला आहे. त्यातून १,२१,७८८ रोजगार निर्माण होण्याची शक्यता असल्याचेही सरकारकडून सांगण्यात आले होते.
मात्र, १३ ऑगस्ट रोजी चेन्नईत झालेल्या ‘वेत्री तामिळनाडू इन्व्हेस्टर्स मीट’मध्ये उद्योग विभागाने ९७ सामंजस्य करारांद्वारे (MoU) ६७,४५२ कोटी रुपयांच्या गुंतवणुकीचे प्रस्ताव प्राप्त झाल्याचे सांगितले होते. या प्रस्तावांमधून १,०६,९९८ रोजगार निर्माण होण्याची शक्यता व्यक्त करण्यात आली होती.
या आकडेवारीवरून सरकारच्या एक लाख कोटी रुपयांच्या दाव्याबाबत DMKने स्पष्टीकरण मागितले आहे. एवढ्या मोठ्या गुंतवणुकीचे दावे केले जात असताना गुंतवणूकदारांची बैठक माध्यमांसाठी खुली का करण्यात आली नाही, असा सवालही पक्षाने केला.
लंडन दौऱ्यावरूनही राजकीय आरोप-प्रत्यारोप
मुख्यमंत्री विजय सध्या लंडन दौऱ्यावर असून, तामिळनाडूत परदेशी गुंतवणूक आणणे हा या दौऱ्याचा प्रमुख उद्देश असल्याचे सरकारकडून सांगण्यात आले आहे. मात्र, विजय यांनी लंडनमधील सिल्व्हरस्टोन मोटर रेसिंग सर्किटला भेट देऊन अभिनेता आणि रेसिंगपटू अजित कुमार यांच्या शर्यतीला उपस्थिती लावल्याने विरोधकांनी त्यांच्यावर निशाणा साधला आहे.
DMKने विजय यांचा दौरा गुंतवणूक आकर्षित करण्याऐवजी मोटार रेस पाहण्यासाठी अधिक असल्याचा आरोप केला. परदेशातून गुंतवणूक आणण्यासाठी मुख्यमंत्री दौरा करत असतील, तर त्याआधी मंत्री आणि अधिकाऱ्यांच्या पातळीवर अनेक बैठका होणे अपेक्षित असते, असा युक्तिवादही ‘मुरासोली’मधून करण्यात आला.
दरम्यान, TVKच्या वतीने विजय यांच्या लंडन दौऱ्याचा बचाव करण्यात आला असून, गुंतवणुकीबरोबरच तामिळनाडूची ‘ब्रँड’ प्रतिमा मजबूत करणे आणि मोटारस्पोर्ट्ससाठी आवश्यक पायाभूत सुविधा समजून घेणे हा दौऱ्याचा एक भाग असल्याचे सांगण्यात आले आहे.
या पार्श्वभूमीवर विजय यांच्या परदेश दौऱ्यातून प्रत्यक्षात किती गुंतवणूक तामिळनाडूत येते आणि सरकारच्या गुंतवणुकीच्या दाव्यांचे स्वरूप काय आहे, यावरून सत्ताधारी TVK आणि विरोधी DMK यांच्यातील राजकीय संघर्ष आणखी तीव्र होण्याची चिन्हे आहेत.
