काँग्रेसने ‘आमदार राखो यात्रा’ काढावी; ‘आप’चा टोला

मडगाव, : राजस्थानमधील नुकत्याच झालेल्या स्थानिक स्वराज्य संस्थांच्या निवडणुकांतील निकालांचा दाखला देत आम आदमी पक्षाने (आप) गोवा काँग्रेसवर टीका केली आहे. काँग्रेसला अधिक जागा मिळूनही काही ठिकाणी भाजपचे उमेदवार महापौरपदी निवडून आल्याचे नमूद करत, गोव्यातही निवडणुकीनंतर अशाच प्रकारचे राजकीय समीकरण निर्माण होऊ शकते, असा दावा ‘आप’ने केला आहे.

राजस्थानातील अजमेर, पाली आणि कुचामन सिटी येथील निकालांचा दाखला ‘आप’ने दिला. अजमेरमध्ये काँग्रेसचे ३७ नगरसेवक, तर भाजपचे ३२ नगरसेवक होते. मात्र महापौरपदाच्या निवडणुकीत भाजपच्या अनामिका शर्मा यांना ४३ मते मिळाली आणि त्या विजयी झाल्या. भाजपला ११ अपक्ष नगरसेवकांचा पाठिंबा मिळाल्याचे वृत्त आहे.

पालीमध्ये काँग्रेसकडे २९, तर भाजपकडे २१ जागा होत्या. मात्र महापौरपदाच्या निवडणुकीत भाजपच्या नमिता बुबकिया यांना ३३ मते मिळाली आणि त्या विजयी झाल्या. या निवडणुकीत काँग्रेसच्या अधिकृत उमेदवाराला केवळ तीन मते मिळाली, तर काँग्रेसमधील बंडखोर उमेदवाराला २९ मते मिळाली.

दरम्यान, ‘आप’चे गोवा संघटन सचिव प्रशांत नाईक यांनी राजस्थानमधील निकालांचा संदर्भ देत काँग्रेसवर टीका केली. “राजस्थानने नुकताच एक धडा दिला आहे. काही ठिकाणी काँग्रेसला अधिक जागा मिळूनही पदाधिकारी निवडीत वेगळे राजकीय समीकरण पाहायला मिळाले. गोव्यात यापूर्वीही पक्षांतराचे राजकारण पाहायला मिळाले आहे,” असे नाईक म्हणाले.

२०१७ मध्ये गोवा विधानसभा निवडणुकीत काँग्रेसचे १७ आमदार विजयी झाले होते. त्यापैकी १० आमदारांनी २०१९ मध्ये भाजपमध्ये प्रवेश केला. २०२२ मध्ये काँग्रेसचे ११ आमदार निवडून आले होते; त्यापैकी आठ आमदारांनी सप्टेंबर २०२२ मध्ये भाजपमध्ये प्रवेश केला.

“बारांमध्ये जनतेने ‘आप’ला स्पष्ट बहुमत दिले आणि पक्षाचे ३१ नगरसेवक पक्षासोबत राहिले. त्यामुळे ‘आप’च्या उमेदवाराची अध्यक्षपदी निवड झाली,” असेही नाईक यांनी सांगितले.

‘आप’चे गोवा वरिष्ठ उपाध्यक्ष संदेश तेलेकर देसाई यांनी काँग्रेसच्या ‘गोय राखण यात्रा’वर टीका केली. “काँग्रेसने आता ‘गोय राखण यात्रा’ थांबवून ‘आमदार राखो यात्रा’ सुरू करावी,” असा टोला त्यांनी लगावला.

काँग्रेस आणि ‘आप’मध्ये भाजपविरोधी मतांचे विभाजन झाल्यास त्याचा निवडणुकीनंतरच्या सत्तास्थापनेवर परिणाम होऊ शकतो, असा दावा देसाई यांनी केला. राजस्थानमधील निकालांचा दाखला देत गोव्यातही निवडणुकीनंतर राजकीय समीकरणे बदलण्याची शक्यता त्यांनी व्यक्त केली.

दरम्यान, ‘आप’चे नेते नीश स्टिव्ह कुटिन्हो यांनी काँग्रेसवर टीका करत, काँग्रेसला दिलेले मत अखेरीस भाजपच्या फायद्याचे ठरू शकते, असा दावा केला. आगामी विधानसभा निवडणुकीच्या पार्श्वभूमीवर मतदारांनी पक्षांतराच्या राजकारणाचा विचार करून मतदान करावे, असे आवाहन ‘आप’कडून करण्यात आले.