मडगावात ‘या’ ठिकाणी लवकरच होणार वैद्यकीय महाविद्यालय
पणजी: दक्षिण गोव्यातील आरोग्य सुविधांमध्ये लवकरच मोलाची भर पडणार आहे. मडगाव येथील कामगार विमा योजना इस्पितळाचे रूपांतर केंद्रीय कामगार मंत्रालयाच्या माध्यमातून वैद्यकीय महाविद्यालयात करण्याचा निर्णय घेण्यात आला आहे.
या नव्या महाविद्यालयामुळे केवळ उपचार सुविधा नव्हे, तर वैद्यकीय शिक्षण, संशोधन आणि प्रशिक्षित मनुष्यबळाची निर्मितीही होणार आहे. स्थानिक युवकांसाठी डॉक्टर, परिचारिका आणि आरोग्य साहाय्यक यांसारख्या व्यावसायिक संधी खुल्या होतील. यामुळे आरोग्य सेवांचा दर्जाही लक्षणीयरीत्या सुधारेल.
पंतप्रधान नरेंद्र मोदी आणि केंद्रीय कामगार तथा रोजगार मंत्री डॉ. मनसुख मांडविया यांचे मनःपूर्वक आभार. त्यांनी ईएसआय मडगाव रुग्णालयाचा समावेश नवीन वैद्यकीय महाविद्यालये स्थापन करण्याच्या विचाराधीन स्थळांच्या यादीत केला. दक्षिण गोव्यातील आरोग्य सुविधा अधिक सक्षम करण्यास आणि वैद्यकीय शिक्षणाच्या संधी वाढविण्यासाठी हे एक महत्त्वपूर्ण पाऊल ठरेल, असे मुख्यमंत्री डॉ. प्रमोद सावंत यांनी यावेळी सांगितले.
