गोवा काँग्रेसकडून माध्यम पथकाची नियुक्ती
पणजी : गोवा प्रदेश काँग्रेस समितीने (जीपीसीसी) पक्षाची प्रसारमाध्यमांमधील उपस्थिती आणि जनसंपर्क अधिक प्रभावी करण्यासाठी तात्पुरत्या माध्यम पथकाची नियुक्ती केली आहे. जीपीसीसी अध्यक्ष गिरीश चोडणकर यांनी मंगळवारी ही घोषणा केली.
अखिल भारतीय काँग्रेस समितीकडून (एआयसीसी) गोव्यासाठी नियमित माध्यम पथकाची नियुक्ती होईपर्यंत हे पथक कार्यरत राहणार आहे. पक्षाची धोरणे, भूमिका, कार्यक्रम आणि जनहिताचे प्रश्न विविध माध्यमांद्वारे प्रभावीपणे मांडण्याची जबाबदारी या पथकावर सोपविण्यात आली आहे.
अमरनाथ पणजीकर यांची मुख्य प्रवक्तेपदी नियुक्ती करण्यात आली असून अॅड. अमित अशोक पालेकर यांच्याकडे समन्वयक व प्रवक्तेपदाची जबाबदारी सोपविण्यात आली आहे.
याशिवाय समिल वळवईकर, अॅड. येमाने डिसोझा, अॅड. शबनम खान, विवेक डिसिल्वा, सॅव्हिओ कुटिन्हो, अॅड. लाविनिया दा कोस्टा, मेनिनो दा क्रूझ आणि महेश म्हांब्रे यांची प्रवक्ते म्हणून नियुक्ती करण्यात आली आहे.
हे पथक पक्ष आणि जनतेमधील संवाद अधिक बळकट करण्यास तसेच लोककल्याण, सुशासन आणि लोकशाही मूल्यांशी संबंधित प्रश्नांवर काँग्रेसची भूमिका प्रभावीपणे मांडण्यास महत्त्वाची भूमिका बजावेल, असा विश्वास चोडणकर यांनी व्यक्त केला.
