डेटा सेंटर सुरक्षेच्या क्षेत्रात ‘गोदरेज’ची एन्ट्री

मुंबई : भारतातील वेगाने विस्तारत असलेल्या डेटा सेंटर आणि डिजिटल पायाभूत सुविधा सुरक्षा क्षेत्रात Godrej Enterprises Group (GEG) ने प्रवेश केला आहे. समूहाच्या सिक्युरिटी सोल्यूशन्स व्यवसायाला Yotta आणि NTT Data Center यांच्याकडून डेटा सेंटरसाठी एकात्मिक ‘Key Management Solution’ तैनात करण्याचे कंत्राट मिळाले आहे. ही प्रणाली Genetec या सुरक्षा प्लॅटफॉर्मशी एकात्मिक करण्यात आली आहे.

केंद्रीकृत किल्ली व्यवस्थापन, कार्यक्षम कार्यपद्धती, Genetecच्या विद्यमान तसेच भविष्यातील सॉफ्टवेअर आवृत्त्यांशी सुसंगतता आणि अधिक सुरक्षितता यांचे प्रात्यक्षिक दिल्यानंतर हा करार मिळाल्याचे कंपनीने सांगितले. Genetec या तंत्रज्ञान भागीदाराच्या शिफारशीनंतर ही संधी मिळाल्याचेही कंपनीकडून स्पष्ट करण्यात आले आहे.

सुरुवातीला एका डेटा सेंटरपुरता मर्यादित असलेला हा प्रकल्प नंतर अनेक डेटा सेंटरपर्यंत विस्तारण्यात आला. Yotta आणि NTT यांच्याशी असलेल्या व्यावसायिक संबंधांमुळे हा विस्तार शक्य झाल्याचे कंपनीचे म्हणणे आहे.

डेटा सेंटर क्षेत्रात वेगाने वाढ

कृत्रिम बुद्धिमत्ता (AI), क्लाउड कॉम्प्युटिंग, डिजिटल पेमेंट्स, ई-गव्हर्नन्स, उद्योगांचे डिजिटलायझेशन आणि डेटा स्थानिकीकरणामुळे भारतात डेटा सेंटरच्या पायाभूत सुविधांमध्ये मोठ्या प्रमाणावर गुंतवणूक होत आहे. भारतातील कार्यरत डेटा सेंटर क्षमता २०२८पर्यंत ३ GW पेक्षा अधिक होण्याची अपेक्षा व्यक्त करण्यात आली आहे.

डेटा सेंटरची क्षमता वाढत असताना केवळ पायाभूत सुविधा उभारण्यापेक्षा सुरक्षितता, सातत्यपूर्ण कार्यप्रणाली, अनुपालन आणि आपत्कालीन परिस्थितीतही सेवा सुरू ठेवण्याची क्षमता यांना अधिक महत्त्व प्राप्त होत आहे. त्यामुळे डेटा सेंटरच्या प्रवेश व्यवस्थापनासह सुरक्षा प्रणाली, नोंदवही (ऑडिट ट्रेल) आणि पायाभूत सुविधांचे एकात्मिक संरक्षण यांची मागणी वाढत असल्याचे कंपनीने म्हटले आहे.

विमानतळे, बँका, सरकारी आस्थापना, उत्पादन उद्योग आणि अन्य महत्त्वाच्या पायाभूत सुविधांच्या सुरक्षेचा अनुभव असलेल्या गोदरेजने आता डिजिटल पायाभूत सुविधा क्षेत्रासाठी तंत्रज्ञानाधारित सुरक्षा उपाय विकसित करण्यावर भर दिला आहे.

दोन वर्षांत ५० कोटींचे लक्ष्य

डेटा सेंटर क्षेत्रातून पुढील दोन वर्षांत ५० कोटी रुपयांच्या महसुलाचे लक्ष्य कंपनीने ठेवले आहे. त्यासाठी एकात्मिक सुरक्षा, की-मॅनेजमेंट, प्रवेश नियंत्रण (Access Control) आणि मिशन-क्रिटिकल पायाभूत सुविधांच्या संरक्षणाशी संबंधित उपायांचा विस्तार करण्यात येणार आहे.

गोदरेज एंटरप्रायझेस समूहाच्या सिक्युरिटी सोल्यूशन्स व्यवसायाचे प्रमुख पुष्कर गोखले म्हणाले, “भारताची डिजिटल अर्थव्यवस्था विस्तारत असताना डेटा सेंटर ही महत्त्वाची पायाभूत सुविधा बनत आहेत. अशा ठिकाणी केवळ स्वतंत्र सुरक्षा प्रणाली पुरेशा नसून सुरक्षितता, निरीक्षण, नोंदवही, विविध प्रणालींमधील एकात्मिकरण आणि कार्यक्षम व्यवस्थापन यांचा समन्वय साधणाऱ्या उपायांची आवश्यकता आहे.”

“डेटा सेंटरमधील आमची वाढती उपस्थिती ही भौतिक सुरक्षा, डिजिटल पायाभूत सुविधा आणि आधुनिक तंत्रज्ञान यांच्यातील वाढत्या समन्वयाचे उदाहरण आहे. संशोधन, विकास आणि अभियांत्रिकी क्षमतेच्या माध्यमातून भारताच्या पुढील पिढीतील डिजिटल आणि भौतिक पायाभूत सुविधांच्या सुरक्षेसाठी योगदान देण्याचे आमचे उद्दिष्ट आहे,” असेही त्यांनी सांगितले.