गोव्यात महिला डिजिटल सशक्तीकरण योजनेअंतर्गत ११५ महिलांना प्रशिक्षण
पणजी : महिलांना डिजिटलदृष्ट्या सक्षम करण्याच्या उद्देशाने गोवा सरकारने सुरू केलेल्या ‘महिला डिजिटल सशक्तीकरण योजने’अंतर्गत (MDSY) आतापर्यंत ११५ महिलांना प्रशिक्षण देण्यात आले आहे. माहिती तंत्रज्ञान, इलेक्ट्रॉनिक्स आणि कम्युनिकेशन्स विभागामार्फत (DITE&C) राबविण्यात येणारी ही योजना १७ फेब्रुवारी २०२६ रोजी सुरू करण्यात आली असून तिची अंमलबजावणी इन्फो टेक कॉर्पोरेशन ऑफ गोवा लिमिटेड (ITG) करत आहे.
या योजनेचा उद्देश महिलांना मूलभूत डिजिटल साक्षरता, संगणक कौशल्ये आणि सुरक्षित डिजिटल व्यवहारांचे प्रशिक्षण देऊन त्यांना शिक्षण, रोजगार आणि वैयक्तिक विकासाच्या नव्या संधी उपलब्ध करून देणे हा आहे. १८ वर्षांवरील आणि किमान १५ वर्षे गोव्यात वास्तव्यास असलेल्या महिलांसाठी ही योजना खुली आहे. प्रशिक्षण आयटी नॉलेज सेंटर्स (ITKC), कॉमन सर्व्हिस सेंटर्स (CSC) आणि पंचायत स्तरावरील केंद्रांमध्ये दिले जात आहे.
माहिती तंत्रज्ञान मंत्री रोहन खंवटे यांनी सांगितले की, ही योजना केवळ प्रशिक्षण कार्यक्रम नसून डिजिटल दरी कमी करण्यासाठीची चळवळ आहे. महिलांना ऑनलाइन व्यवसाय, सरकारी सेवा, डिजिटल व्यवहार आणि नव्या कौशल्यांचे प्रशिक्षण देऊन आत्मनिर्भर बनविण्याचा प्रयत्न या माध्यमातून केला जात आहे.
सुकूर पंचायतच्या सरपंच सोनिया संजय पेडणेकर यांनी या उपक्रमाचे स्वागत करत महिलांना त्याचा लाभ घेण्याचे आवाहन केले. तर पर्वरी येथील वैश्णवी मळीक यांनी प्रशिक्षणादरम्यान ऑनलाइन फसवणूक टाळण्याचे उपाय आणि मुलांच्या मोबाइल वापरावर लक्ष ठेवण्यासंबंधी उपयुक्त माहिती मिळाल्याचे सांगितले.
प्रशिक्षणामध्ये मोबाइल वापर, सोशल मीडियाचा जबाबदारीने वापर, ऑनलाइन पेमेंट आणि डिजिटल बँकिंग, डिजिटल बाजारपेठ, सायबर सुरक्षा तसेच डिजिटल संवाद या विषयांचा समावेश आहे. पर्वरी आणि डिचोली येथे झालेल्या प्रशिक्षण सत्रांमध्ये सुमारे ११५ महिलांनी सहभाग घेतला. पुढील सत्रे बाणस्तारी, सांखळी, चोडण आणि पेडणे येथे आयोजित करण्यात येणार आहेत.
दरवर्षी सुमारे ३,००० महिलांना या योजनेचा लाभ देण्याचे लक्ष्य असून, या उपक्रमामुळे गोव्यातील महिलांचा डिजिटल क्षेत्रातील सहभाग वाढण्यास मदत होणार असल्याचा विश्वास व्यक्त केला जात आहे.
