केंद्रीय मंत्री रवनीत बिट्टू यांनी ‘का’ दिला अचानक राजीनामा?
नवी दिल्ली : नीट पेपरफुटी प्रकरणावरून राजधानी दिल्लीत सुरू असलेल्या राजकीय घडामोडींना नवे वळण मिळाले आहे. शिक्षणमंत्री धर्मेंद्र प्रधान यांच्या राजीनाम्याच्या मागणीसाठी विरोधकांकडून जंतर-मंतरवर आंदोलन सुरू असतानाच केंद्रीय रेल्वे राज्यमंत्री आणि अन्न प्रक्रिया उद्योग राज्यमंत्री रवनीत सिंग बिट्टू यांनी मंत्रिपदाचा अचानक राजीनामा दिला आहे. या वृत्ताला एएनआयने दुजोरा दिला आहे.
२० जुलै रोजी हजारो विद्यार्थ्यांनी संसदेकडे मोर्चा काढला होता. या मोर्चादरम्यान पोलिसांनी आंदोलकांवर लाठीचार्ज करत अश्रुधुराच्या नळकांड्यांचा वापर केला. या कारवाईनंतर केंद्र सरकारवर विरोधकांनी जोरदार टीका केली असून, दिल्लीतील राजकीय वातावरण तापले आहे.
अशा परिस्थितीत रवनीत सिंग बिट्टू यांच्या अचानक झालेल्या राजीनाम्यामुळे राजकीय वर्तुळात विविध चर्चांना उधाण आले आहे. राजीनाम्यामागील नेमके कारण अद्याप स्पष्ट झालेले नसले, तरी त्यांनी पंतप्रधानांशी चर्चा केल्यानंतर हा निर्णय घेतल्याचे सांगितले जात आहे. राष्ट्रपती द्रौपदी मुर्मू यांनीही त्यांचा राजीनामा तत्काळ स्वीकारला आहे.
रवनीत सिंग बिट्टू हे पंजाबमधील भाजपचे नेते आणि राज्यसभा खासदार आहेत. २०२४ पासून त्यांच्याकडे रेल्वे राज्यमंत्री तसेच अन्न प्रक्रिया उद्योग राज्यमंत्रीपदाची जबाबदारी होती. त्यांच्या राजीनाम्यामुळे केंद्र सरकारमध्ये पुढे कोणते राजकीय बदल होणार, याकडे आता सर्वांचे लक्ष लागले आहे.
