गृह आधार, आरोग्य विमा आणि वीजदरांवरून ‘आप’ची राज्य सरकारवर टीका

पणजी : भाजप सरकारने गोव्याला अपयशाशिवाय काहीही दिलेले नाही. मुख्यमंत्री प्रमोद सावंत आणि भाजप प्रदेशाध्यक्ष दामू नाईक यांनी आता आपला गाशा गुंडाळावा, कारण गोमंतकीय त्यांना सत्तेतून हटविण्यास सज्ज आहेत, अशी टीका आम आदमी पक्षाचे (आप) गोवा प्रदेशाध्यक्ष वाल्मिकी नाईक यांनी केली. भाजपच्या योजनांमधील त्रुटींमुळे सामान्य नागरिकांमध्ये नाराजी असल्याचा दावाही त्यांनी केला.

गोव्यासाठी ‘आप’ने जाहीर केलेल्या हमींवर दामू नाईक यांनी केलेल्या टीकेला प्रत्युत्तर देताना वाल्मिकी नाईक यांनी राज्य सरकारच्या विविध योजनांच्या अंमलबजावणीवर प्रश्न उपस्थित केले. यावेळी ‘आप’चे उपाध्यक्ष मॅन्युएल कार्दोझो, सुनील सिंगणापूरकर आणि फोंडा विधानसभा मतदारसंघाचे अध्यक्ष गीतेश नाईक उपस्थित होते.

‘गृह आधार’ योजनेतील वाढीवर प्रश्न

गेल्या १५ वर्षांत गृह आधार योजनेच्या आर्थिक लाभात केवळ ३०० रुपयांची वाढ झाली आहे, असे वाल्मिकी नाईक यांनी सांगितले. सरकारच्या कल्याणकारी योजनांचा सामान्य नागरिकांना अपेक्षित लाभ मिळत नसल्याचा आरोपही त्यांनी केला.

दीन दयाळ स्वास्थ्य सेवा योजना (DDSSY) अंतर्गत नोंदणीकृत कुटुंबांची संख्या २.९ लाखांवरून १.३८ लाखांवर आल्याचा दावा त्यांनी केला. एका स्थानिक महिलेला पित्ताशयाच्या शस्त्रक्रियेसाठी अडीच लाख रुपये खर्च करावे लागले, मात्र या योजनेतून केवळ २५ हजार रुपये मिळाल्याचे उदाहरण त्यांनी दिले. या योजनेच्या लाभाची व्याप्ती आणि प्रत्यक्ष वैद्यकीय खर्च यांमध्ये मोठी तफावत असल्याचे ते म्हणाले.

याउलट, पंजाबमधील ‘आप’ सरकार प्रत्येक कुटुंबाला १० लाख रुपयांपर्यंतचे आरोग्य विमा संरक्षण देत असल्याचे त्यांनी नमूद केले. गोव्यातील ‘आप’चे आमदारही आपल्या मतदारसंघांमध्ये नागरिकांना विनामूल्य आरोग्यसेवा उपलब्ध करून देण्यासाठी प्रयत्नशील असल्याचा दावा त्यांनी केला.

म्हादई आणि टीसीपी कायद्यावरून सवाल

‘आप’चे उपाध्यक्ष सुनील सिंगणापूरकर यांनी टीसीपी कायद्यातील कलम ३९-अ रद्द करण्याबाबत दामू नाईक यांनी भूमिका स्पष्ट करावी, असे आव्हान दिले. म्हादई नदीच्या प्रश्नावरूनही त्यांनी भाजप सरकारवर टीका केली.

म्हादईचा प्रश्न सोडविण्यात भाजप अपयशी ठरल्यामुळे गोव्यातील पाणीटंचाईचे संकट गंभीर होत असल्याचा आरोप सिंगणापूरकर यांनी केला. कर्नाटकातील राजकीय हिताला प्राधान्य दिले जात असल्यामुळे म्हादईचा प्रश्न मार्गी लावण्यास टाळाटाळ होत असल्याचा दावाही त्यांनी केला.

उज्ज्वला योजनेच्या अंमलबजावणीवर टीका

‘आप’चे उपाध्यक्ष मॅन्युएल कार्दोझो यांनी प्रधानमंत्री उज्ज्वला योजनेच्या अंमलबजावणीवर प्रश्न उपस्थित केले. योजनेसाठी अर्ज मिळविण्याकरिता नागरिकांना सरकारी कार्यालयांत वारंवार जावे लागत होते. काही सरकारी कार्यालयांमध्ये अर्जांचे नमुनेही उपलब्ध नव्हते, असा आरोप त्यांनी केला.

स्थानिक स्वराज्य संस्थांकडे त्यांच्या क्षेत्रातील लोकसंख्येची माहिती उपलब्ध असताना नागरिकांना पुरेशा प्रमाणात अर्ज का पुरविण्यात आले नाहीत, असा सवाल कार्दोझो यांनी उपस्थित केला.

वाढीव वीजबिले आणि रुग्णालयाचा प्रश्न

फोंडा विधानसभा मतदारसंघाचे अध्यक्ष गीतेश नाईक यांनी वीजदर आणि आरोग्य सुविधांवरून सरकारला लक्ष्य केले. पंजाबमध्ये ‘आप’ सरकार मोफत वीज उपलब्ध करून देत असल्याचा उल्लेख करत, गोव्यातील नागरिकांना मात्र वाढीव वीजबिलांचा सामना करावा लागत असल्याचा आरोप त्यांनी केला.

फोंडा पोटनिवडणुकीनंतर आयडी रुग्णालयाचे जिल्हा रुग्णालयात रूपांतर करण्याचे मुख्यमंत्री प्रमोद सावंत यांनी दिलेले आश्वासन अद्याप पूर्ण झालेले नसल्याचा दावाही गीतेश नाईक यांनी केला.

राज्यातील कल्याणकारी योजनांची अंमलबजावणी, आरोग्यसेवा, वीजदर, म्हादई नदीचा प्रश्न आणि रुग्णालयाच्या सुविधांवरून भाजप सरकारला घेरण्याचा प्रयत्न ‘आप’च्या नेत्यांनी केला. सरकारच्या कामकाजावर जनतेमध्ये नाराजी असल्याचा दावा करत, आगामी काळात भाजपला सत्तेतून हटविण्यासाठी पक्ष प्रयत्न करणार असल्याचे त्यांनी स्पष्ट केले.