युवक काँग्रेसतर्फे नीट पेपरफुटी आणि वाढत्या बेरोजगारीविरोधात आंदोलन

मडगाव :
गोवा प्रदेश युवक काँग्रेस समितीने अध्यक्ष आर्चित नाईक यांच्या नेतृत्वाखाली नीट (NEET) पेपरफुटी प्रकरण आणि देशातील वाढत्या बेरोजगारीच्या प्रश्नाविरोधात मडगाव येथे भव्य आंदोलन आयोजित केले.

या आंदोलनात भारतीय युवक काँग्रेसचे राष्ट्रीय अध्यक्ष उदय भानू चिब, अखिल भारतीय काँग्रेस समितीचे गोवा प्रभारी माणिकराव ठाकरे, काँग्रेस कार्यसमितीचे कायम निमंत्रित सदस्य गिरीश चोडणकर, गोवा प्रदेश काँग्रेस समितीचे अध्यक्ष अमित पाटकर, दक्षिण गोव्याचे खासदार कॅप्टन व्हिरियातो फर्नांडिस, आमदार कार्लोस आल्वारेस फेरेरा, चारही जिल्हा काँग्रेस अध्यक्ष, युवक काँग्रेस पदाधिकारी तसेच गोव्याच्या विविध भागांतून आलेले शेकडो काँग्रेस कार्यकर्ते आणि युवक मोठ्या संख्येने सहभागी झाले होते.

आंदोलनाची सुरुवात मडगाव येथे झाली असून मोर्चाचा समारोप भाजपच्या दक्षिण गोवा कार्यालयाबाहेर करण्यात आला. यावेळी युवक काँग्रेस कार्यकर्त्यांनी नीट पेपरफुटी प्रकरण आणि विद्यार्थ्यांच्या प्रश्नांबाबत केंद्र सरकारच्या अपयशाचा निषेध म्हणून केंद्रीय शिक्षणमंत्री धर्मेंद्र प्रधान यांचा पुतळा जाळून निषेध व्यक्त केला.

सभेला संबोधित करताना भारतीय युवक काँग्रेसचे राष्ट्रीय अध्यक्ष उदय भानू चिब यांनी भाजप-नेतृत्वाखालील केंद्र सरकारवर जोरदार टीका केली. त्यांनी सरकारवर भ्रष्टाचार, निष्क्रियता आणि खोट्या आश्वासनांमुळे देशातील युवकांचे भविष्य उद्ध्वस्त केल्याचा आरोप केला. नीट पेपरफुटीमुळे लाखो मेहनती विद्यार्थ्यांची स्वप्ने चुराडा झाली असून, निष्पक्ष आणि पारदर्शक परीक्षा घेण्यात केंद्रीय शिक्षण मंत्रालय पूर्णपणे अपयशी ठरल्याचे त्यांनी सांगितले.

उदय भानू चिब यांनी मोदी सरकारवर युवकांना रोजगार उपलब्ध करून देण्यातही अपयशी ठरल्याचा आरोप केला. युवक रोजगार, पारदर्शकता आणि उत्तरदायित्वाची मागणी करत असताना सरकार जबाबदारीपासून पळ काढत असल्याची टीकाही त्यांनी केली.

आंदोलनात उपस्थित सर्व नेत्यांनी केंद्रीय शिक्षणमंत्री धर्मेंद्र प्रधान यांची तात्काळ बडतर्फी, नीट पेपरफुटी प्रकरणाची सर्वंकष आणि निष्पक्ष चौकशी, दोषींवर कठोर कारवाई तसेच देशातील वाढत्या बेरोजगारीच्या प्रश्नावर तातडीने प्रभावी उपाययोजना करण्याची एकमुखी मागणी केली.

यावेळी बोलताना गोवा प्रदेश युवक काँग्रेस अध्यक्ष आर्चित नाईक यांनी सांगितले की, गोव्याचा युवक अन्याय आणि युवकविरोधी धोरणांविरोधात आपला आवाज बुलंद करत राहील. विद्यार्थ्यांच्या भविष्याशी कुठलाही तडजोड होऊ देणार नाही आणि परीक्षा प्रक्रियेत पारदर्शकता तसेच युवकांसाठी अर्थपूर्ण रोजगाराच्या संधी उपलब्ध करून देण्यासाठी युवक काँग्रेस सातत्याने संघर्ष करत राहील, असे त्यांनी स्पष्ट केले.

गोवा प्रदेश युवक काँग्रेसने विद्यार्थ्यांबरोबर, नोकरी शोधणाऱ्या युवकांबरोबर आणि देशातील तरुण पिढीबरोबर ठामपणे उभे राहण्याची आपली बांधिलकी पुन्हा अधोरेखित केली. तसेच सरकारने तात्काळ योग्य पावले उचलली नाहीत तर येत्या काळात आंदोलन अधिक तीव्र करण्यात येईल, असा इशाराही देण्यात आला.