म्हापसा जिल्हा रुग्णालयातील वीज खंडित प्रकरणाची चौकशी करण्याची काँग्रेसची मागणी
म्हापसा : म्हापसा जिल्हा रुग्णालयात रविवारी झालेल्या कथित वीज खंडित प्रकरणावरून काँग्रेसचे नेते अमरनाथ पणजीकर यांनी राज्य सरकारवर टीका करत चौकशीची मागणी केली आहे.
प्रसिद्धीपत्रकाद्वारे पणजीकर यांनी दावा केला की, सायंकाळी सुमारे ४ वाजण्याच्या सुमारास सुरू झालेल्या वीज खंडितामुळे जवळपास तीन तास रुग्णालयातील सेवा विस्कळीत झाल्या. यामुळे लिफ्ट, प्रकाश व्यवस्था तसेच काही वैद्यकीय उपकरणांच्या कार्यावर परिणाम झाला असल्याचे त्यांनी म्हटले आहे.
या घटनेमुळे उपचार घेत असलेले रुग्ण, ज्येष्ठ नागरिक, भेट देणारे नागरिक, डॉक्टर, परिचारिका आणि इतर कर्मचारी यांना मोठ्या अडचणींना सामोरे जावे लागल्याचा दावा त्यांनी केला. तसेच आपत्कालीन परिस्थितीत आरोग्य आणि वीज विभागाची तयारी तसेच पर्यायी वीज व्यवस्थेच्या कार्यक्षमतेबाबत प्रश्न उपस्थित होत असल्याचेही त्यांनी नमूद केले.
रुग्णालयासारख्या महत्त्वाच्या सार्वजनिक आरोग्य संस्थेत इतका दीर्घकाळ वीजपुरवठा खंडित राहण्यामागील कारणे सरकारने स्पष्ट करावीत, अशी मागणी पांजेकर यांनी केली. आवश्यक पायाभूत सुविधांच्या देखभालीकडे दुर्लक्ष झाल्याचा आरोपही त्यांनी यावेळी केला.
या प्रकरणाची सखोल चौकशी करून जबाबदारी निश्चित करावी आणि भविष्यात राज्यातील कोणत्याही रुग्णालयात अशी परिस्थिती उद्भवू नये यासाठी तातडीने उपाययोजना कराव्यात, अशी मागणी त्यांनी केली.
